Bakteret “shëtisin” në çantën e kozmetikës

Çanta e kozmetikës në të cilën shumë gra i vendosin pajisjet e grimit të tyre përfshin një numër jashtëzakonisht të madh të baktereve. Sigurisht, për ne këto baktere janë të padukshme, por nën mikroskop është tjetërqysh.

Prandaj, mikrobiologu dr. Farbod Nekoui u rekomandon zonjave që menjëherë të hedhin çantën e tyre të kozmetikës dhe ta marrin një tjetër, për të shmangur që bakteret të vijnë në kontakt me lëkurën dhe të shkaktojnë irritim apo infeksion.

Kur çantat e tyre të kozmetikës ia dorëzuan dr. Nekouit për testim, shumë zonja u habitën me informacionin se lapsi për vetulla, lapsi për sy, furça për skuqje, si dhe furça për vetulla – janë "vatër" e baktereve.

Shumica e baktereve ndodhen në lapsin për sy (eyeliner), i cili është përgjegjës për më shumë se 50 për qind të infeksioneve, thonë studiuesit nga Asociacioni Evropian për Mikrobiologji Klinike dhe Sëmundje Infektive.

Në furçën për vetulla ndodhet një "koloni" e tërë e baktereve të cilat mund të gjenden në lëkurën e njeriut, por edhe në ujë, pluhur dhe në kripë, transmeton Koha.net. Këto baktere në shumicën e rasteve janë të padëmshme, edhe pse ka disa raste të rralla të infeksioneve të rënda të shkaktuara nga bakteret në njerëzit me sistemet e dobëta imune.

Bakteri “Staphylococcus epidrmidis” mund të gjendet në furçën për skuqje dhe furçën për vetulla. Ky bakter shpesh ndodhet në lëkurën e njeriut edhe në mjedise spitalore. Megjithatë, në vitet e fundit ai është bërë një nga shkaqet kryesore të infeksioneve të ndryshme, dhe mund të shkaktojë edhe disa sëmundje kronike, thonë ekspertët.

"Sa më gjatë që të përdorni një produkt kozmetik, më të mëdha janë gjasat për të ‘ruajtur’ baktere në të", thotë dr. Nekoui.

Për t’i parandaluar bakteret që të zhvillohen dhe të "shëtisin" lirisht në çantën tuaj kozmetike, dr. Nekoui rekomandon që herë pas here t’i lani brushat ose sfungjerët të cilët i përdorni për të vënë grim.

Për t’i larguar bakteret, ndonjëherë zbrazeni dhe lajeni mirë çantën tuaj të kozmetikës. /Telegrafi/