Bajrami kritikon Kurtin: Shpërndarja e kontratave në KEK, tentativë për manipulim elektoral

Deputetja e LDK-së, Hykmete Bajrami ka theksuar se veprimet e fundit të kryeministrit Albin Kurti në KEK dhe SHSKUK janë shkelje të ligjit dhe manipulim për qëllime zgjedhore.

Sipas Bajramit, Ligji për Ndërmarrjet Publike ndalon ushtrimin e pozitave drejtuese në ndërmarrje publike për ata që kanë mbajtur poste politike në tri vitet e fundit, por sipas saj Kurti, duke qenë kryeministër, ka shërbyer edhe si drejtor i KEK-ut dhe i burimeve njerëzore.

“Ligji për Ndërmarrje Publike, thotë se nuk mund të bëhesh drejtor në ndërmarrje publike nëse në 36 muajt e fundit ke mbajtur ndonjë post politik. Ndërsa, Albin Kurti, duke qenë kryeministër i vendit, për një çast jo vetëm që ushtroi pozitën e drejtorit të KEK-ut, por edhe atë të drejtorit të burimeve njerëzore. Kjo është shkelje ligjore – ky është keqpërdorim i ndërmarrjeve publike për blerje votash”, ka shkruar Bajrami në një postim në Facebook.

Bajrami ka kritikuar shpërndarjen e 220 kontratave punësimi në KEK, duke e quajtur këtë veprim një keqpërdorim të ndërmarrjes publike për fitime zgjedhore.

Lexo po ashtu Mori pjesë në nënshkrimin e 220 kontratave të punëtorëve të rinj në KEK, Çitaku kritikon Kurtin: Farsë e mjerë

Ajo e cilësoi këtë si një tentativë për të siguruar mbështetje elektorale në mënyrë të paligjshme, duke i maskuar si punësime për “mihje dhe prodhim qymyri.”

Po ashtu, Bajrami e kritikoi hapjen e një konkursi nga SHSKUK për 370 pozita, që kanë qenë të mbajtura për më shumë se 10 vite nga ushtrues detyre.

“Drejtori i SHSKUK-së, para katër ditësh paralajmëroi hapjen e një konkursi për 370 pozita që kanë qenë të mbajtura nga ushtrues detyre për më shumë se 10 vite. Pyetja është: Pse këto pozita u ruajtën për kaq gjatë dhe po shpallen pikërisht tani, në prag të zgjedhjeve? Është e qartë se ky konkurs nuk ka për qëllim reformimin e sistemit shëndetësor, por është një tjetër mashtrim dhe manipulim elektoral”, ka shkruar deputetja e LDK-së.

Sipas Bajramit, ky konkurs ka vetëm qëllime elektorale, pasi shpallet në prag të zgjedhjeve dhe nuk do të përfundojë përpara datës 9 shkurt.

“Albin Kurti po përpiqet të shpëtojë veten, duke përdorur çdo mjet për të marrë vota. Por koha e fushatave me manipulime dhe premtime boshe po mbaron. Ndryshimi po vjen”, tha Bajrami, duke theksuar se mbështetja për Kurtin ka rënë dhe ai tani po përdor taktika të pasinqerta për të ruajtur pushtetin. /Telegrafi/