Avokati Qerkini: Gjykata ka vendosur kundërligjshëm për paraburgimin e Nuredin Lushtaku

Avokati i Nuredin Lushtakut, ka bërë të ditur se këto ditë do të ankohen në Gjykatën e Apelit, në mënyrë që të anulohet vendimi për vazhdimin e paraburgimit për klientin e tij.

“Gjykata në mënyrë të paligjshme e ka vazhduar paraburgimin për këtë arsye ne do të ankohemi në gjykatën e apelit”, ka deklaruar Qerkini.

Avokati Qerkini, ka thënë se masa e paraburgimit nuk konsiderohet dënim, kurse  me këtë vendim të Gjykatës për vazhdimin e paraburgimit sipas tij pa fakte të qëndrueshme, masa e paraburgimit po bëhet dënim për klientin e tij.

“Tek ne masa e paraburgimit po konsiderohet si dënim, kjo masë nuk është dënim. Nëse vazhdohet paraburgimi, pa u plotësuar kushtet ajo pastaj është dënim. Paraburgimi është masë mbrojtëse, nëse ekzistojnë provat për arratisje, apo ndikim  dëshmitarëve”, ka deklaruar Qerkini.

I pyetur se si ka arritur arma zyrtare e policit të përfshirë në incident me Lushtakun, në duart e Bekim Jasharit, avokati Qerkini ka thënë se duhet t’i presim hetimet për këtë gjë.

Qerkini ka folur edhe për Gjykatën Speciale dhe procesin që po zhvillohet në Hagë.

Sipas avokatit Artan Qerkini, Gjykata Speciale në Hagë, përdorë metoda që nuk i përdorin gjykatat e rregullta.

Qerkini është shprehur se kjo gjykatë është duke i shkelur disa prej të drejtave themelore të të pandehurve.

Sipas tij, vendimet e gjykatës nuk po përkthehen në gjuhën shqipe.

“Ajo i ka shkelur në masë të konsiderueshme disa prej të drejtave dhe atë të drejtën për përdorimin e gjuhës. Vendimet nuk janë duke iu përkthyer të pandehurve. Z. Gucati dhe Haradinaj janë dënuar dhe ne nuk kemi aktgjykim në gjuhën shqipe të plotë”, ka thënë ai.

Për mungesën e përkthimit në gjuhën shqipe, Qerkini ka bërë të ditur se është ngritur shqetësimi tek Avokati i Popullit që funksionin në kuadër të Gjykatës Speciale.

Një nga vendimet absurde sipas Qerkinit është edhe vazhdimi i paraburgimit për ish-krerët e UÇK-së./RTV Dukagjini/