Austria vlerëson lartë Kombëtaren shqiptare

Trajneri i Austrisë, Marsel Koller, vlerëson në maksimum Shqipërinë.

Në prag të ndeshjes miqësore, 55-vjeçari zviceran që drejton prej 5 vitesh Kombëtaren austriake nuk i kurseu elozhet për skuadrën e De Biazit në konferencën për shtyp gjatë së premtes.

“Shqipëria ka një ekip kompakt, të përgatitur shumë mirë nga ana taktike. Ata kanë pësuar shumë pak gola gjatë edicionit të fundit. Është një skuadër me kualitet dhe ua ‘nxin jetën’ kundërshtarëve. Duhet të jemi të përqendruar për përballjen me ta”, deklaroi fillimisht Koller. Për trajnerin e Austrisë, kjo ndeshje shihet si një test i rëndësishëm në prag të Evropianit.

“Është e rëndësishme për mua që të shoh gjendjen e lojtarëve, aq më tepër që përballë kemi një skuadër të fortë. E kemi studiuar kundërshtarin dhe e kam të qartë se si Shqipëria luan. Gjithsesi, ne më shumë do t’i kushtojmë vëmendje lojës sonë. Luajmë në shtëpi dhe duhet të kënaqim tifozët me një fitore, për ta nisur mbarë vitin”, theksoi kreu i pankinës austriake.

Koller mendon se Shqipëria nuk di vetëm të mbrojë mirë por edhe të rrezikojë në sulm.

“Kundërshtari luan shpejt nga krahët dhe për ne është një provë e mirë, sepse kjo skuadër ka karakteristika të ngjashme me rivalët tanë në Evropian. Nuk mund të them saktësisht se është si Hungaria apo Islanda, megjithatë rëndësi ka që për ne është një ndeshje që na vlen”.

“Shqipëria ka ngjitur shumë vende në renditjen e FIFA-s”, është shprehur trajneri zviceran. Gjatë konferencës për shtyp, Koller bëri të ditur se skuadra e tij duhet të jetë agresive në fushë, ndërsa u kërkon lojtarëve të bëjnë kujdes në prapavijë.

“Duhet të jemi agresivë që në fillim, kështu mund t’ia bëjmë më të lehtë vetes. Nuk duhet të lëmë hapësira mbrapa, pasi Shqipëria luan me kundërsulm dhe do të jetë gati për të na ndëshkuar. Në fushë do të hedhim skuadrën që ka luajtur më shumë gjatë edicionit të fundit. Megjithatë, gjatë lojës do të bëjmë ndryshimet e nevojshme, pasi kemi gjashtë zëvendësime në dispozicion”, përfundoi Koller.