Lorenzo Pellegrini do të vazhdoj t'i qëndrojë besnik Romës së tij edhe për pesë vite të tjera.
Kapiteni i Romës është futur në vitin e fundit të kontratës, por kryeqytetasit nuk kanë pasur fare frikë për largimin e tij.
Mesfushori italian ka pasur një klauzolë largimi prej vetëm 30 milionë euro dhe skuadrat më të mëdha evropiane interesoheshin për të, por pa sukses, pasi dëshira e tij ishte të qëndronte në Olimpico.
Tanimë është arritur marrëveshja mes klubit dhe agjentëve të lojtarit për kontratën e re, e cila do ta mbajë Pellegrinin në Olimpico deri në verën e vitit 2026.
25-vjeçari do të bëhet lojtari i dytë më i paguar në klub me pagë vjetore prej katër milionë euro në sezon plus bonuse. Vetëm anglezi Tammy Abraham do të fitojë më shumë se kapiteni.
Mediat në Itali kanë raportuar se palët tanimë kanë gjetur marrëveshjen e cila pritet të zyrtarizohet gjatë ditëve të ardhshme, sapo të mbërrijë në Itali presidenti i Romës, Dan Friedkin.
Pellegrini është futbollist i dalë nga Akademia e Romës, por ai kaloi dy vite te Sassuolo nga 2015 deri në 2017 para se të rikthehej në kryeqytetin italian ku tani është kapiten i Giallorosëve. /Telegrafi/
