Arrestohet avokati gjatës seancës, reagon OAK

Dega e Odës së Avokatëve të Kosovës në Prishtinë, ka reaguar ndaj ngjarjes që ka ndodhur sot në Gjykatën Themelore në Prishtinë, ku gjatë një seance gjyqësore, prokurori Ali Hajdini ka urdhëruar zyrtarët policorë që të bëjnë arrestimin e avokatit Nasuf Hasani.

Sipas OAK-ut, këtë urdhër Hajdini e kishte dhënë gjatë seancës në të cilën ai ishte përfaqësues i akuzës, ndërsa avokati përfaqësonte të pandehurin në të njëjtën procedurë.

“Dega Regjionale e Prishtinës shpreh shqetësimin e saj serioz duke kërkuar që veprimet e tilla të mos përsëriten dhe se avokati dhe prokurori janë palë të barabarta në procedurë, andaj dega regjionale e Prishtinës lidhur me këtë rast në ditët në vijim do të ndërmarrim të gjithë hapat ligjor me qëllim të mbrojtjes së avokatëve, si dhe kërkon nga Këshilli Prokurorial i Kosovës dhe nga kryeprokurori i Prokurorisë Themelore në Prishtinë, Imer Beka që të ndërmarrin masa të menjëhershme ndaj prokurorit në fjalë i cili në mënyrë recidive abuzon me pozitën e prokurorit për të iu hakmarrë palëve në procedurë”, thuhet në komunikatë.