Arabia Saudite konfirmon që do të konkurrojë për të organizuar Kupën e Botës 2034

FIFA ftoi vendet nga Azia dhe Oqeania për të paraqitur ofertat dhe Arabia Saudite shpalli menjëherë ofertën e saj për organizmin e Kupës së Botës 2034.

Federata e Futbollit të Arabisë Saudite ka njoftuar se dëshiron të organizojë një “turne të klasit botëror”, duke shtuar se do të frymëzohet nga “pasioni i rrënjosur thellë për futbollin” i këtij vendit.

“Oferta e parë e Arabisë Saudite për Kupën e Botës mbështetet nga përvoja në rritje e vendit në organizimin e ngjarjeve të futbollit të klasit botëror dhe planet e saj të vazhdueshme për të mirëpritur tifozët anembanë botës në Kupën e Botës për Klube 2023 dhe Kupën e Azisë 2027”, thuhet në deklaratën e lëshuar nga Shoqata Saudite e Futbollit.

Njoftimi saudit erdhi menjëherë pasi FIFA konfirmoi se Maroku, Spanja dhe Portugali do të jenë mikpritëse të Kupës së Botës 2030, duke shtuar se tre nga ndeshjet e Kupës së Botës do të luhen në Uruguai, Argjentinë dhe Paraguai.

Pasi FIFA njoftoi se Kupa e Botës 2034 do të mbahet në Azi ose Oqeani, presidenti i Konfederatës së Futbollit të Azisë, Salman bin Ebrahim Al Khalifa e përshëndeti vendimin.

Lexo po ashtu Kupa e Botës 2030 do të zhvillohet në gjashtë shtete dhe tre kontinente

“Ne besojmë fuqimisht se kjo hap rrugën për një mundësi të drejtë për të gjitha konfederatat për të konkurruar dhe pritur Kupën e Botës”, deklaroi ai.

Kohët e fundit, Arabia Saudite ka investuar qindra milionë euro në zhvillimin e infrastrukturës dhe për lojtarë. Vetëm në afatin e fundit kalimtar, klubet e Ligës Profesionale Saudite (SPL) shpenzuan më shumë se 950 milionë dollarë për nënshkrime.

Një numër i futbollistëve më të mirë, si Cristiano Ronaldo, Neymar, Karim Benzema dhe Marcelo Brozović, kanë nënshkruar së fundmi kontrata me para të mëdha me klubet saudite.

Kupa e Botës e ardhshme e vitit 2026, në të cilin do të marrin pjesë 48 kombëtare, do të zhvillohet në SHBA, Meksikë dhe Kanada. /Telegrafi/