Apple kishte një marrëveshje ‘sekrete’ me Kinën, me vlerë 275 miliardë dollarë

Tim Cook ka investuar shumë në përpjekjet për ta mbajtur kompaninë Apple përpara konkurrencës në tregun kinez.

Faqja e internetit Information publikoi një raport të gjatë, me detaje që tregojnë për përpjekjet e CEO të Apple, Tim Cook për të vendosur marrëdhënie të forta midis Apple dhe autoriteteve dhe agjencive kineze.

Duke cituar intervista dhe akses të drejtpërdrejtë në dokumentet e brendshme të Apple, raporti tregon për një marrëveshje prej 275 miliardë dollarësh, që sugjeron se Apple ka një investim të madh në infrastrukturën teknologjike dhe trajnimin në Kinë.

Kontrata jo e detyrueshme pesëvjeçare e Cook u nënshkrua gjatë një vizite në Kinë në vitin 2016 dhe u nënshkrua pjesërisht për të zbutur ose parandaluar veprimet rregullatore nga qeveria kineze që do të kishin efekte të rëndësishme negative në biznesin e Apple në atë vend.

Përveç kësaj, Apple ka premtuar të përdorë më shumë komponentë nga furnizuesit kinezë në pajisjet e saj, të lidhë marrëveshje me kompanitë kineze të softuerëve, të bashkëpunojë në teknologji me universitetet kineze dhe të investojë drejtpërdrejt në kompanitë kineze të teknologjisë dhe të investojë miliarda dollarë “krahasuar me atë që kompania ka shpenzuar tashmë në Kinë çdo vit. Një pjesë e këtyre parave do të shkonte për ndërtimin e objekteve të reja të shitjes me pakicë, qendrave të kërkimit dhe zhvillimit dhe projekteve të energjisë së rinovueshme, siç thuhet në marrëveshje.

Deri më sot, Apple ka respektuar në masë të madhe pjesën e saj të marrëveshjes dhe raporti përshkruan gjithashtu raste të jashtëzakonshme kur Apple ka përfituar nga marrëveshja dhe ka anashkaluar me sukses kufizimet që përndryshe do të vendoseshin ndaj kompanive të huaja në Kinë.

Për shembull, çelësat për enkriptimin e të dhënave të përdoruesve iCloud për rajonin kontrollohen nga Apple, pavarësisht përpjekjeve të qeverisë për të inkurajuar, presion ose detyruar kompanitë e huaja që t’ia dorëzojnë përgjegjësinë për ato të dhëna kompanive kineze. Nga ana tjetër, detyrimi i Apple për të respektuar rregulloret dhe politikat rregullatore të qeverisë kineze ishte pjesë e marrëveshjes dhe Apple shpesh plotësonte kërkesat për të hequr aplikacionet dhe përmbajtjet që ishin në kundërshtim me prioritetet dhe qëllimet e shtetit.

Apple ka performuar më mirë në Kinë se shumica e kompanive konkurruese të teknologjisë amerikane, dhe raporti thotë se kjo u arrit kryesisht falë lobimit nga Tim Cook, nënshkrimit të kontratave dhe ndërtimit të marrëdhënieve të mira. /Telegrafi/