Apple ka ndërprerë përkohësisht prodhimin e telefonave të palosshëm për shkak të një defekti në ekran

Apple po punon në prodhimin e një kategorie të re produktesh – telefona dhe tabletë inteligjentë të palosshëm.

Apple ende nuk ka njoftuar zyrtarisht hyrjen në segmentin e produkteve të palosshme, dhe raportet e mëparshme të saj kanë lënë të kuptohet se kompania ende është në fazën e saj kërkuese. Pra, nuk është gati të prezantojë diçka së shpejti.

Megjithatë, tani dyshohet se kompania ka hasur në një pengesë gjatë këtij procesi, shkruajnë mediat e huaja, përcjell Telegrafi.

Ka pretendime se gjiganti teknologjik ka blerë disa telefona inteligjentë të palosshëm nga markat e tjera konkurruese për t’i çmontuar, që t’i ndihmojnë me “përshpejtimin e procesit të kërkimit dhe zhvillimit”.

Por, duket se ky proces ka ngecur për shkak të një testimi në ekran i cili nuk ka ofruar rezultate të kënaqshme. Meqenëse ekrani është një nga pjesët kryesore të një pajisjeje, kjo ka të ngjarë të shtyjë afatin kohor të prezantimit të një produkti të palosshëm.

Raportet e mëparshme sugjeruan se një pajisje e palosshme nga Apple mund të prezantohet në vitin 2026 ose 2027, ndërsa kompania po punon në të paktën dy prototipe të reja të iPhone, të cilat pritet të jenë konkurruese ndaj modeleve Galaxy Z Flip të Samsung. /Telegrafi/