Me Apple Card do të lehtësohet shumë blerja e iPhonëve të rinj

Apple ka zhvilluar një aktivitet, ku ka treguar për të ardhurat e tremujorit të fundit – të ardhurat kanë pësuar rritje të lehtë, shërbimet po shkojnë shumë mirë, ndërsa shitjet e iPhonëve kanë pësuar rënie – si pjesë e këtyre njoftimeve, drejtori i përgjithshëm i Apple, Tim Cook ka bërë të ditur për një përditësim të ri në Apple Card, që do të fillojë së shpejti.

Shfrytëzuesit e kësaj kartele atraktive, do të kenë mundësi të blejnë iPhone të ri, që do ta paguajnë nëpërmjet 24 kësteve mujore, me kamatë zero dhe pa tarifa vjetore, transmeton Telegrafi.

Atyre do t’ju kthehen prapa tre për qind të pagesës së përgjithshme, para të gatshme të cilat mund t’i menaxhojnë nëpërmjet aplikacionit Wallet.

Nëpërmjet iPhone Upgrade Program, Apple ofron  blerjen e një iPhone të ri dhe pagesë me 24 këste, me zero interes, mirëpo me kartelë, mundëson që të blihet nga një iPhone për çdo vit.

Derisa tha se ky opsion do të lansohet gjatë këtij viti, Cook nuk bëri të ditur datën specifike se kur do të fillojë ky shërbim.

Shefi i Apple, vlerësoi gjithashtu se Apple Card është “lansimi më i suksesshëm ndonjëherë, i një karte krediti në Shtetet e Bashkuara”.

Kartela luksoze prej titaniumi, ofron shpërblime të shumta me para, nuk ka kamata vjetore, ndërsa është nxitje që të blihen nga Apple, sa më shumë shërbime dhe produkte të reja. /Telegrafi