Apeli e kthen në rigjykim për një pikë të aktakuzës rastin ndaj Ilir Tolajt dhe të tjerëve, për dy tjera refuzon aktakuzën

Gjykata e Apelit, e ka aprovuar pjesërisht ankesën e Prokurorisë Speciale, në rastin e të akuzuarve Ilir Tolaj dhe të tjerët.

Të gjithë këta të akuzuarit do të gjykohen edhe njëherë për veprën penale të keqpërdorimit të pozitës zyrtare.

“Gjykata e Apelit e ka aprovuar pjesërisht ankesën e Prokurorisë Speciale, në rastin e të akuzuarve I.T, A.P. H.F., B.F. dhe Z.K. Aktgjykimi i Gjykatës Themelore në Prishtinë, i datës 25.11.2019, në pikën 2 të pjesës liruese, sa i përket aktakuzës 1, për veprat penale Keqpërdorimi i pozitës zyrtare dhe autoritetit nga neni 422 par.1 dhe 423 lidhur me nenin 81 i Kodit Penal të Republikës së Kosovës (pika 1.7 dhe pika 1.9), është prishur dhe çështja i është kthyer gjykatës së njëjti në rigjykim dhe rivendosje.

Pika II e pjesës liruese, të aktgjykimit në fjalë, për veprën penale nga akuza 1, pika 1.8 dhe akuza 12, është ndryshuar, ashtu që aktakuza në këtë pjesë është refuzuar, për shkak të parashkrimit absolut të ndjekjes penale. Po është ndryshuar edhe pika I e pjesës refuzuse, të aktgjykimit, për veprën penale nga akuza 1, pika 1.10 dhe akuza 8, ku aktakuza e prokurorisë është refuzuar për shkak se këto vepra penale janë gjykuar me aktgjykim të formës së prerë”, thuhet në njoftim.

Apeli ka njoftuar se pjesa tjetër e aktgjykimit, konkretisht në pikën 1 të pjesës refuzuese, për veprat penale nga akuza 1 pika 1.1, 1.2, 1.3, 1.6, dhe akuza 2 për të akuzuarit I.T. dhe A.P, është vërtetuar. /Telegrafi/