Anibari mirëpret retrospektiven e Georges Schwizgebel

Për Georges Schwizgebel është hera e parë në Kosovë, dhe natyrisht që atë e sjellë festivali Anibar, për të shpalosur punën e tij 46-vjeçare tek të interesuarit në këtë fushë.

Filmat e Georges Schwizgebel udhëtojnë nëpër hapësirë dhe kohë ndërkohë që ne lëvizim në kohë reale. Me këta filma ka fituar shumë çmime si ”Best Short Film” në Swiss Film Prize, ndërsa filmi ”Romance” i cili është në bashkëpunim me Bordin Kombëtar të Filmit të Kanadës dhe dy studio zvicerane ishte një nga 5 animacionet e nominuara për edicionon e 32-të të ”Genie Awards” ku fitoi çmimin ”Best animated short”.

Georges Schwizgebel për herë të parë vjen për publikun e festivalit dhe të Kosovës në ekspozitën me 16 piktura të tij. Këto piktura janë të nxjerra nga pjesët e filmave, si pjesë e teknikës me të cilën ai i krijon filmat e animuar duke e pikturuar secilën kuadër kësisoj duke krijuar iluzionin e lëvizjes.

Ekspozita do të mbahet në Galerinë e Arteve në Pejë prej datës 15 gusht deri në fund të festivalit. Këtë vit mjeshtri i animacionit do të na nderojë me prezencën e tij si pjesë e jurisë për kategoritë garuese, dhe me retrospektiven e tij me 19 gusht e cila përfshinë një program të filmave më të mirë dhe një prezantim lidhur me punën e tij.