Analistët: Patjetër të pastrohet lista zgjedhore, Maqedonia të mos e lëshoj këtë shans

Nëse është kohë e mjaftueshme që deri më tre prill të përfundojë pastrimi i Listës zgjedhore, nënkryetari i KSHZ-së, Rexhep Prekopuca, në emisionin “Rruga e Re” në tv Shenja, tha se KSHZ-ja është e gatshme që ta bëjë këtë deri në afatin e caktuar.

“Punën tonë si KSHZ jemi në gjendje ta kryejmë. Kontrollin në terren jemi në gjendje ta kryejmë”, tha Prekopuca.

Ndërsa kryetari i Asociacionit MOST, Darko Aleksov, shprehu shqetësimin e tij lidhur me transparencën e procesit. Sipas tij, qytetarët duhet të informohen për çdo ditë mbi progresin e kontrolleve të KSHZ-së.

“Një gjë është shumë e rëndësishme, e ajo është transparenca e këtij procesi. Vlerësoj se opinioni publik duhet të informohet për rrjedhën e procesit gjatë ditës së djeshme, që të mos ketë vend për spekulime, pasi kjo do ta bënte procesin të pabesueshëm”, tha Aleksov.

Nga ana tjetër, ministri i Brendshëm, Oliver Spasovski, deklaroi se duhet të mobilizohen të gjitha partitë politike, institucionet, si dhe KSHZ-ja, që të arrihet pastrimi i Listës zgjedhore. Sipas tij, ky shans nuk duhet lëshuar në asnjë rast.

“Maqedonia nuk duhet ta lëshojë këtë shans për shkak se kemi hyrë në një proces i cili duhet t’i ndihmojë shtetit që të dalë nga kjo krizë dhe kjo mund të arrihet me Marrëveshjen e Përzhinos. Pra këtë shans duhet ta shfrytëzojnë të gjithë, edhe partitë politike, edhe institucionet edhe KSHZ-ja, dhe të arrijmë që ta pastrojmë Listën zgjedhore. Të jemi të sinqertë, Listë zgjedhore ideale nuk do të ketë”, deklaroi Spasovski.

I pyetur për mbi 124 mijë votuesit e dyshimtë, Prekopuca tha se shumica e këtyre personave janë me qëndrim jashtë vendit.

“124 mijë e 72 persona ka të bëjë me dyshimin se këta a janë jashtë vendit me qëndrim të përkohshëm. Të gjithë nëntë anëtarët e KSHZ-së u pajtuam se nuk ka asnjë dyshim për këta persona se ato kanë të drejtën vote dhe kanë të drejtën të jenë në Listën zgjedhore”, deklaroi Prekopuca.

Sipas Prekopucës, prej 124 mijë votuesve të dyshimtë, 35 mijë janë në njësinë numër gjashtë e që nuk don të thotë se të gjithë janë shqiptar. /Telegrafi/