Dyshja angleze Manchester United dhe Chelsea janë bashkuar me garën për mbrojtësin e Arsenalit, Hector Bellerin.
23-vjeçari ishte më parë subjekt i interesit të ngushtë nga Barcelona, por kjo ndjekje u mbyll me nënshkrimin e Nelson Semedos nga Benfica verën e kaluar.
Edhe gjiganti italian, Juventusi thuhet se mban një interes të fortë për mbrojtësin spanjoll dhe e dëshiron atë gjatë verës.
Megjithatë, transferimi i Bellerinit do të jetë i vështirë shkaku edhe i konkurrencës së fortë që vjen tani nga Liga Premier.
Sipas një raport në mediumin spanjoll Diario Sport, dy klubet e mëdha angleze, Unitedi dhe Chelsea janë futur në garë për shërbimet e spanjollit.
Këto dy skuadra thuhet se po peshojnë ofertat prej 40 milionë eurosh për mbrojtësin me pasigurinë e të ardhmes së tij me klubin londinez.
Me largimin e Arsene Wengerit në fund të sezonit thuhet se mund të bëhet edhe një lëvizje e lojtarit nga Emirates.
Ndryshe, Bellerin ka tri paraqitje me Kombëtaren e Spanjës, ndërsa ka bërë mbi 150 paraqitjen me ekipin e parë të Topçinjve. /Telegrafi/