(E plotësuar) Katër persona kanë mbetur të vdekur nga të shtënat me armë zjarri në kompaninë e anijeve në Glyfada – Athinë të Greqisë.
Sipas informacioneve të mediave greke, personi i armatosur që hapi zjarr në zyrat e kompanisë së anijeve u gjet i vdekur në bodrumin e pallatit, me një armë pranë tij.
Para se t'i jepte fund jetës, personi i armatosur - një ish-punonjës i kompanisë, 70 vjeç, me origjinë egjiptiane, sipas informacioneve - qëlloi tre persona brenda kompanisë, të cilët vdiqën.
Sulmuesi dyshohet se hyri në zyra nga parkingu i ndërtesës. /Telegrafi/
Një i vdekur dhe dy të plagosur nga të shtënat në një kompani në Athinë të Greqisë – policia po e trajton si "një situatë pengjesh"
Një person i armatosur ka hapur zjarr në selinë e një kompanie transporti në Glyfada, në jug të Athinës.
Si pasojë, siç raportojnë mediat e huaja, përcjell Telegrafi, ka gjetur vdekjen një person ndërsa janë plagosur dy të tjerë.
Raportet tregojnë se sulmuesi, që dyshohet se ishte një ish-punonjës egjiptian që kërkonte hakmarrje për shkarkimin e tij, aktualisht është i bllokuar brenda ndërtesës.
Policia, pjesëtarët e njësisë elitare të antiterrorizmit dhe mjekët i janë përgjigjur incidentit, duke e trajtuar atë si një situatë pengjesh.
Aktualisht po zhvillohen negociatat me autorin.
Si pasojë e operacionit policor është ndërprerë qarkullimi në rrugët përreth. /Telegrafi/