Luis Suarezi ka rrezikuar të nxisë zemërimin e tifozëve të Liverpoolit duke folur për transferimin e mundshëm të Philippe Coutinhos te Barcelona.
Mesfushori brazilian kishte kërkuar të shkonte në Camp Nou gjatë verës, mirëpo Redsat nuk e lejuan largimin e tij, përkundër ofertave të njëpasnjëshme të Blaugranëve.
Suarez, i cili në vitin 2014 kaloi nga Liverpooli te Barcelona për 85 milionë euro, beson se Coutinho do të kishte shumë sukses te Barcelona.
I pyetur se çfarë do t’i ofronte Barca, sulmuesi uruguaian ka thënë për Mundo Deportivo: “Shumë. E njoh atë si njeri dhe si lojtar, sepse kam luajtur me të, por të gjithë e ditë se çfarë do të kontribuonte Coutinho”.
“Ai është një lojtar, i cili në ditët e sotme luan në nivel shumë të lartë”.
“Natyrisht se e dëshiron (transferimin), sepse ai është një lojtar ambicioz dhe çdo lojtar dëshiron transferimin te Barca”.
“Ai ka kaluar nëpër një moment mjaft të vështirë, mirëpo si profesionist ka vazhduar të tregojë se sa lojtar i mirë është dhe çfarë cilësish personale posedon”.
“Edhe pse ishte përpjekur të largohej nga Liverpooli, ai vazhdoi t’i ndihmonte skuadrës dhe vazhdoi të angazhohej”, ka deklaruar Suarez. /Telegrafi/
