Shtëpia e fëmijërisë së Papa Leo XIV – Papa i parë amerikan në historinë e Kishës Katolike – po del në shitje përmes një ankandi luksoz, pas një vale të papritur interesi që shpërtheu pas zgjedhjes së tij në Selinë e Shenjtë më 8 maj.
Sipas mediave të huaja, përcjell Telegrafi, prona ndodhet rreth 30 kilometra në jug të Çikagos dhe përfshin tre dhoma gjumi.
Ankandi do të fillojë nga 250,000 dollarë, dhe shitësi ka treguar se është i gatshëm të pranojë një ofertë në çdo kohë para se ankandi të mbyllet më 18 qershor.
Fillimisht, shtëpia ishte një pronë standarde banimi dhe u listua në janar për 219,000 dollarë pasi u rinovua plotësisht nga një investitor i pasurive të paluajtshme që e kishte blerë atë një vit më parë për vetëm 66,000 dollarë.
Megjithatë, edhe pasi e uli çmimin në 199,000 dollarë, ajo mbeti në treg pa lëvizje për disa muaj.
Por gjithçka ndryshoi më 8 maj.
Vetëm disa orë pasi Kardinali Robert Francis Prevost, 69 vjeç, u zgjodh Papë dhe mori emrin Leo XIV, shitësi e tërhoqi menjëherë shtëpinë nga tregu pasi mori tetë oferta brenda disa orësh.
Interesi për pronën u rrit kur u zbulua se Papa i sapozgjedhur kishte kaluar dy dekada të fëmijërisë së tij në këtë shtëpi, duke jetuar me babanë e tij Louis, një mësues, nënën e tij Mildred, një bibliotekare dhe dy vëllezërit e tij. /Telegrafi/