Sërish mbetemi në fund të Evropës

Sot jemi shteti me demokracinë më të dobët në Evropë, jemi vendi Ballkanik me më së shumti njerëz që emigrojnë në perëndim. Ne kemi rreth 700 mijë shqiptarë emigrantë në Greqi e rreth 300 mijë "kosovarë" në Zvicër e po kaq në Gjermani e Itali e gjetiu. Dhe, shtetet shqiptare nuk ndajnë asnjë lek për një abetare të atyre trashëgimtarëve tanë, që ta mësojnë gjuhën e historinë e Atdheut të tyre, e të baballarëve të tyre.

Ne i përjashtojmë nga jeta sociale ata të cilët na i sjellin gjysmë miliard euro, që si shtet në kurrizin e tyre jetojmë. Ndërsa serbët pas 200 vitesh shkojnë në Shqipëri dhe shpikin “serbët myslimanë”. Në anën tjetër, në Medvegjë, Bujanovc e Preshevë, ironizohen shqiptarët; tkurren në lëkurën e tyre, e krahasimi me serbë të Kosovës me ta është e paimagjinueshme.

Kujdesemi të mos i lëndojmë të tjerët, e për të përbashkëtën tonë jemi tejet të pakujdesshëm, duke e mbyllur shtegun e lirisë së individit! Sot Shqiptaret janë më të izoluarit në Evropë, veçmas Kosova. Pse? Sepse ne nuk kemi personalitet, e identitet të shtetit të mirëfilltë, se politikanët janë të papërgjegjshëm.

Ekzistencën, lirinë e demokracinë e kemi të linçuar, ku të gjithë sot, të shkolluar e të pashkolluar, të rinj dhe pleq e ëndërrojnë migrimin "drejt tokave të premtuara", për një jetë më të mirë. Prandaj, të mos jetë sot vetëm një ditë e humbur e punës, në emër të kësaj feste shumë sublime të pavarësisë, por të reflektojmë, e të marrim përgjegjësi për punë të ndershme e më guxim, për ndryshime pozitive në shërbim të së sotmes, e të së ardhmes.

T’i kthehemi vetës sonë që nga zanafilla, t’i marrim ato vlera që na takojnë e të mos i lëmë në duart e të tjerëve. Do ritheksuar: gjërat e imëta e bëjnë tërësinë. Të kuptojmë se liria e individit, dhe perspektiva e tij (e shumicës) te ne, sot, është e varur në një fije merimange. Dhe kjo po na thërret në përgjegjësi më shumë së kurrë! Kjo përgjegjësi, ne na takon. Të mos i gëzohemi pasurisë më shumë se lirisë! Këtu është thelbi i madhështisë njerëzore!

(Marrë nga: Shekulli)