Në një atmosferë festive, Swissalbs Award Gala Night, ngjarja më e madhe shoqërore e komunitetit shqiptar në Zvicër, mblodhi figura të rëndësishme nga bota e sipërmarrjes, shkencës dhe kulturës shqiptare për të nderuar arritjet e jashtëzakonshme të pjesëtarëve të komunitetit.
Fituesi kryesor i mbrëmjes ishte mjeshtri i njohur i orologjisë dhe themeluesi i ateliesë Akrivia, Rexhep Rexhepi.
Ai u vlerësua me çmimin “Entrepreneur Award 2025” për fuqinë e tij inovative në ndërmarrësi, duke bashkuar mjeshtërinë tradicionale të orologjisë gjenevase me estetikën moderne.
“Ky çmim është një njohje për ekipin tim dhe për vlerat që na udhëheqin: pasionin, mjeshtërinë dhe guximin për të ndërmarrë diçka të re”, u shpreh Rexhepi gjatë marrjes së çmimit, i cili iu dorëzua nga kompania LIKA Group AG, një prej partnerëve kryesorë të swissalbs.
Për herë të parë këtë vit, në bashkëpunim me Shoqatën e Inxhinierëve Shqiptarë (AES), swissalbs ndau edhe çmimin për arritje shkencore – “Academic Excellence Award”.
Fituesja ishte studiuesja Advije Rizvani, e cila u vlerësua për kontributin e saj të shquar në fushën e sigurisë kibernetike në tregtinë financiare një fushë që, siç u theksua në ceremoni, “ka ndikim potencial miliarda dollarësh”.
Kryetari i swissalbs, Përparim Avdili, theksoi rëndësinë e kësaj mbrëmjeje, duke deklaruar: “Ne duam të tregojmë se fëmijët dhe nipërit e gjeneratës së punëtorëve sezonalë sot kontribuojnë në mënyrë të pazëvendësueshme në gjallërinë, larminë dhe forcën e shoqërisë zvicerane”.
Ndërkohë, Arbela Statovci, bashkëthemeluese dhe anëtare e bordit të swissalbs, nënvizoi: “Fuqia inovative e komunitetit shqiptar në Zvicër do të formësojë dhe përcaktojë edhe të ardhmen e vendit”.
Mbrëmja u përmbyll me fjalën e Arben Ademit, themelues dhe CEO i markës botërore të kozmetikës Gisada, i cili tha: “Historitë që dëgjuam sonte tregojnë fuqishëm se sa shumë forcë ka në komunitetin tonë. Inovacioni, angazhimi dhe dija janë shtyllat mbi të cilat ne ndërtojmë së bashku një të ardhme të suksesshme – për komunitetin shqiptar të Zvicrës dhe për vetë Zvicrën”.
Swissalbs është organizata ombrellë e komunitetit shqiptar në Zvicër dhe luan rol kyç në promovimin e shkëmbimit ekonomik, kulturor, arsimor dhe politik midis shqiptarëve dhe shoqërisë zvicerane.
Përmes çmimeve vjetore, ajo synon të bëjë të dukshëm kontributin e çmuar të komunitetit shqiptar në të gjitha fushat. /Telegrafi/