Penza pret nominimin për Ligën WBFAL

Bordi i Federatës së Basketbollit të Kosovës në mbledhjen e mbajtur të hënën ka njoftuar se ka të drejtën e nominimit të ekipeve nga Kosova për pjesëmarrje në këtë ligë, pasi ka marrë ftesë, shkruan sot Koha Ditore.

Është bërë e ditur se Bordi gjatë ditës së martë do t'i njoftojë klubet e femrave për kushtet e pjesëmarrjes në këtë ligë dhe do të caktojë një afat prej 72 orësh për të pritur interesimin e klubeve që të garojnë në WBFAL.

Ndërkohë, trajneri i Penzës, Fabian Gjuka, ka deklaruar se ekipi i tij është i gatshëm për këtë ligë. Ai ka shtuar se në momentin që FBK-ja do të nominojë Penzën do të vijnë edhe përforcimet e para për pjesëmarrje të suksesshme në ligën WBFAL.

“Ne tashmë kemi marrëveshje gojore me dy basketbolliste nga Kosova, tri nga Shqipëria dhe dy të huaja”, ka thënë ai.