Nëse udhëtoni shpesh, tashmë e dini që udhëtimi i lehtë është mënyra më e mirë për të lëvizur lirshëm. Sepse në fund të fundit, kush dëshiron të rëndohet me valixhe të mbushura gjatë një udhëtimi?
Për t’ju ndihmuar të paketoni me zgjuarsi, kemi përzgjedhur 6 lloje të materialeve që nuk rrudhen lehtë dhe janë të lehta për t’u larë.
Zgjedhja e këtyre rrobave me këto materiale, do t’ua bëjë më të lehtë udhëtimin tuaj edhe nëse jeni në vizitë zyrtare.
Ja çfarë duhet të merrni me vete në udhëtimin tuaj të radhës:
Veshjet me lesh Merino
E dini që Leshi merino është një material natyral dhe ‘inteligjent’ që i përshtatet temperaturës së trupit tuaj. Ju mban freskët kur është nxehtë dhe ju ngroh kur është ftohtë, falë xhepave të vegjël të ajrit në fibrat e tij. Përveç se është i lehtë për t’u mbajtur, leshi merino është gjithashtu rezistent ndaj rrudhave!
Si ta lani: Mund të pastrohet me dorë në ujë të ftohtë me detergjent për lesh ose me programin e veçantë për lesh në lavatriçe.
Veshjet me material Kashmiri
Kur udhëtoni, komoditeti është thelbësor – dhe kashmiri është materiali ideal për këtë qëllim. Është luksoz, i butë dhe rrallë rrudhet. Edhe nëse bluzat prej kashmiri dalin pak të rrudhura nga valixhja, mjafton t’i varni ose t’i shtrini mbi një sipërfaqe të sheshtë për t’i kthyer në gjendje perfekte.
Këshillë praktike: Veshjet delikate vendosini në çanta për pastrim kimik para se t’i palosni. Kjo do t’i mbrojë nga rrudhat gjatë udhëtimit.
Veshjet me najlon dhe poliestëri
Shumë njerëz i shmangin këto materiale, por najloni dhe poliestëri janë idealë për veshje udhëtimi. Janë rezistentë ndaj rrudhave dhe thahen shpejt, duke i bërë perfekte nëse duhet të lani rrobat me dorë gjatë udhëtimit – do të jenë gati për t’u veshur mëngjesin tjetër.
Këshillë për paketim: Për çdo palë pantallona, paketoni tre bluza – zënë më pak hapësirë dhe mund të krijoni kombinime të ndryshme.
Veshjet me materiale të thurura, Trikotazhi (Knitwear)
Ka shumë lloje trikotazhesh si pambuku, leshi apo fibra sintetike, të cilat janë perfekte për udhëtime. Trikotazhet kërkojnë pak përkujdesje dhe nuk rrudhen lehtë, duke ju kursyer kohë dhe stres.
Këshillë për organizim: Vendosni rrobat delikate rreth triko apo bluza trikotazhi për t’i mbrojtur gjatë transportit.
Veshjet me material Neopreni
Neopreni nuk është vetëm për veshje zhytjeje apo plazhi. Tani mund të gjeni bluza dhe pantallona të punuara nga ky material i fortë, i cili është shumë rezistent ndaj rrudhave, fleksibël dhe lehtësisht i paketueshëm.
Xhinset
Edhe pse më të rënda se materialet e tjera, xhinset janë zgjedhje e shkëlqyer për udhëtime. Nuk rrudhen lehtë dhe mbajnë formën më mirë se shumica e materialeve. Nëse shfaqen rrudha, thjesht përdorni tharësen e flokëve për të zbutur palosjet.
Këshillë për valixhen: Zgjidhni xhinse me përbërje elastike – janë më të lehta, më komode për t’u veshur dhe përshtaten më mirë në hapësira të vogla.