Nga palltot klasike te xhaketat moderne, ky aksesor sjell kontrast dhe stil
Shallet prej gëzofi artificial nuk janë më të rezervuar vetëm për mbrëmje apo raste formale. Përkundrazi, gjatë sezoneve të fundit po i shohim gjithnjë e më shpesh edhe në kombinime të përditshme dimërore, pikërisht sepse ofrojnë ngrohtësi, teksturë interesante dhe i japin edhe outfit-it më të thjeshtë një karakter të veçantë.
Ndryshe nga shallet klasikë prej leshi apo pambuku, modelet prej gëzofi artificial kanë një strukturë më të theksuar. Ato nuk shërbejnë vetëm si aksesor praktik, por marrin edhe rolin e një aksesor dominues. Funksionojnë më së miri kur pjesa tjetër e kombinimit është me prerje të thjeshtë, sepse kështu vijnë plotësisht në pah pa u dukur të ekzagjeruara, transmeton Telegrafi.
Në veshjet e përditshme, shalli prej gëzofi artificial mund të kombinohet me një pallto me prerje të drejtë, xhaketë sportive dimërore apo edhe me xhaketë lëkure, duke krijuar një kontrast interesant materialesh. Ngjyrat neutrale si bezhë, krem, gri apo e zeza janë më të lehtat për t’u kombinuar dhe japin një pamje elegante, ndërsa nuanca si çokollatë apo bordo shtojnë një dozë sofistikimi.
Për mbrëmje dhe raste më formale, ky lloj shalli mund të zëvendësojë një pelerinë klasike apo bolero. I hedhur mbi supe, i kombinuar me një fustan të thjeshtë, ai i jep veshjes një pamje të përfunduar dhe të rafinuar. Në këto kombinime, tekstura e tij vjen në pah maksimalisht dhe stilit i shton një notë diskrete, por shumë efektive.
Megjithatë, vëmendje duhet t’i kushtohet edhe proporcioneve. Modelet më të shkurtra dhe kompakte duken më të rregullta dhe kombinohen më lehtë, ndërsa shallet më të gjatë dhe voluminozë mbartin një mesazh më të fortë mode dhe kërkojnë një bazë vizuale edhe më të qetë.
/Telegrafi/