Gonzalo Higuain është alternativa e Alvaro Moratas nëse Milani i shmanget dënimit nga UEFA dhe mban vendin e tyre në Ligën e Evropës, raportojnë mediat në Itali.
Ka pasur raportime në rritje që Higuain është vendosur në treg nga Juventusi pasi drejtuesit duan ta ndryshojnë qendërsulmuesin e tyre.
Kështu, sulmuesi argjentinas është lidhur me Chelsean, nëse ata emërojnë ish-trajnerin e tij te Napoli, Maurizio Sarrin.
Një lëvizje brenda kampionatit italian, Serie A, duket e pamundur, sidomos me një çmim të menduar prej 60 milionë eurosh.
Por, sipas mediumit Corriere dello Sport, El Pipita shihet si një alternativë më e lirë dhe më e suksesshme se zgjedhja e parë, Morata.
Sigurisht, gjithçka varet nga mbajtja e vendit të Rossonerëve në Ligën e Evropës pas vendimit për parregullsitë e tyre financiare.
Presidenti Yonghong Li është aktualisht në negociata për të shitur disa nga aksionet e tij tek një investitor i ri, që besohet të jetë nga Amerika apo Malajzia.
Në rast se Milani i shmanget dënimit nga UEFA, drejtuesit e klubit duan t'ia plotësojnë dëshirën tifozëve duke transferuar disa emra të njohur. /Telegrafi/