Drejtori i Shërbimit Spitalor Klinik Universitar, Valbon Krasniqi, ka thënë se gjendja nëpër klinikat e QKUK-së dhe spitalet e përgjithshme është më e qetë sa i përket numrit të pacientëve me COVID-19.
Krasniqi në një konferencë për media tha se aktualisht në trajtim janë 455 pacientë me coronavirus, transmeton Telegrafi.
“Sot gjendjen nëpër klinikat e QKUK-së dhe spitalet e përgjithshme e kemi shumë më të qetë, sa i përket numrit të pacientëve dhe ngarkesave që i kemi pasur javëve të kaluara. Aktualisht sot janë duke u trajtuar 455 pacientë në klinikat e QKUK-së dhe spitalet e përgjithshme. Kemi rënie diku rreth 30 përqind”, është shprehur Krasniqi.
Megjithatë, Krasniqi tha se përkundër rënies së pacientëve të hospitalizuar qytetarët duhet të kenë vigjilencë maksimale.
Ndryshe, sot ministri i Shëndetësisë, Arben Vita njoftoi se do të lehtësohen masat antiCOVID, dhe se ditën e hënë do të hapen shkollat dhe çerdhet.
Në 24 orët e fundit në Kosovë janë konfirmuar 133 raste. /Telegrafi/