Khabib rikthen rivalitetin me McGregor, publikon video ku irlandezi goditet nga anëtari i ekipit të tij

Khabib Nurmagomedov e ka nxitur sërish rivalitetit e vjetër me Conor McGregor duke publikuar një video nga dueli i tyre në kuadër të ‘UFC 229’.

Ajo që ndodhi pas përballjes ndërmjet dy yjeve të UFC-së në vitin 2018 ishte kryetemë e mediave sportive për disa jave, duke qenë se shkaktoi përleshje masive ndërmjet kampeve kundërshtare.

Ndërsa pas pensionimit të serishëm të irlandezit nga artet e përziera marciale, kampioni i peshave të lehta vendosi ta ngacmojë me një ‘GIF’ në rrjetet sociale që e shfaqte anëtarin e ekipit të tij, Zubaira Tukhugov, duke e goditur McGregorin.

Ndërsa përshkrimin për miliona ndjekësit e tij e ka shoqëruar me mesazhin: “Për tifozët”.

Kujtojmë që pasi e nënshtroi Conorin, Khabib doli nga tetëkëndëshi dhe filloi ta sulmonte trajnerin e irlandezit, Dillon Danis, duke nxitur kështu përleshje në masë që është konsideruar si një prej momenteve më kundërthënëse në UFC.

Pas asaj që ndodhi, Nurmagomedov u suspendua për nëntë muaj, kurse McGregor për gjashtë. /Telegrafi/