Drejtori i Juventusit, Giorgio Chiellini
Drejtori i Juventusit, Giorgio Chiellini, e pranon se klubi mund të ëndërrojë për fitimin e Ligës së Kampionëve, por paralelisht duhet të qëndrojë “me këmbë në tokë” për përballjen e madhe kundër Borussia Dortmund sonte në stadiumin Allianz në Torino.
Juventusi ka nisur sezonin në Serie A në mënyrë perfekte, duke fituar të tre ndeshjet e para, përfshirë fitoren dramatike 4-3 ndaj Interit të shtunën në Torino.
“Ne fituam kundër Interit dhe jemi shumë të lumtur. Nuk mendoj se duhet shumë për të rizbuluar entuziazmin, pastaj varet nga ne ta marrim atë energji dhe ta kultivojmë, por gjithashtu të ruajmë ekuilibrin”, deklaroi Chiellini për Sky Sport Italia.
Ai shtoi se disa gjëra janë bërë mirë, të tjera më pak, por trajneri Igor Tudor ka punuar me qartësi gjatë ditëve të fundit të stërvitjes, ndërsa ekipi ndjehet i motivuar nga tifozët entuziastë.
Në lidhje me ëndrrën për Ligën e Kampionëve pas një pritjeje 30-vjeçare, Chiellini deklaroi se Juventusi gjithmonë luan për objektiva të mëdha
“Sigurisht që të gjithë duhet të ëndërrojnë gjëra të mëdha, kështu që në ëndrrat e mia po. Por objektivi i parë është të përmirësohemi nga sezoni i kaluar dhe pastaj të shohim se ku përfundojmë. Nëse arrijmë atje, atëherë mund të fillojmë të ëndërrojmë”, nënvizoi Chiellini.
Chiellini ka një raport të ngushtë me Tudorin, të cilin e njeh si ish-shok skuadre dhe si asistent trajner te Andrea Pirlo.
“Ne e njohim mirë njëri-tjetrin dhe diskutojmë shumë gjëra. Jam gati ta ndihmoj sa herë ka nevojë, por një pjesë e madhe e meritave për këtë fillim sezoni i takon Tudorit, sepse ai ka sjellë qëndrueshmëri dhe ka imponuar idetë e tij të qarta në grup”, deklaroi ish-mbrojtësi italian. /Telegrafi/