Ja si e shpëtoi futbolli Hoxhën nga ekzekutimi

Rrëqethët kur nis të tregojë rrëfimin se si 16 vite më parë futbolli ia shpëtoi jetën. Hoxha thotë se bashkë me bashkëshorten, fëmijët, prindërit dhe gjyshen ishin në shtëpinë e tyre në Gjakovë, kur forcat paramilitare serbe u futën me dhunë, duke thyer derën. Shpejtë nisën t'i nxjerrin në oborr. Bashkëshortja, fëmijët, prindërit dhe gjyshja kishin dalë tashmë, kurse Hoxha nuk ishte lejuar. E kishin mbështetur për muri.

"Kisha veshur tuta të sportistit në natën e 1 apo 2 prillit", nis rrëfimin prekës Hoxha. "Kur më pa se kisha veshur tutat më pyeti se çfarë profesioni kam", shpjegon Hoxha për Kohën Ditore.

Hoxha menjëherë i ishte përgjigjur se është futbollist. "Futballer", i ishte drejtuar Hoxha ushtarit. Pos pëshpëritjes "futballer", Hoxha në momentet më të zorshme të jetës ishte kujtuar të thoshte edhe një emër tjetër. Kishte përmendur emrin e ish-futbollistit të njohur sovjet dhe tashmë trajner i famshëm ukrainas, Oleg Blokhin.

Trajneri gjakovar ndiente se nuk kishte të bënte me serb në atë moment.

"Kur unë e thashë emrin e lojtarit të ish-Bashkimit Sovjetik, Oleg Blokhin, ushtari më tha se nuk do të më vriste", thotë Hoxha. "E kuptova se ishte rus nga e folura", shtoi Hoxha.

Dhe ushtari rus që po terrorizonte banorët vendas përkrah serbëve, për të mos u vërejtur "lëshimi" i tij, gjuajti dy herë në ajër me automatik për të krijuar bindjen te serbët që ishin jashtë dhe se kreu punën. Ndërkohë, Genc Hoxhës i tha të ikte sa më shpejt. /Telegrafi/