Interi thuhet se ka arritur një marrëveshje në parim për të zgjatur kontratën e Milan Skriniar deri në verën e vitit 2023.
Mbrojtësi sllovak është njëri nga lojtarët më të mirë të Interit aktualisht dhe ndër më meritorët për rikthimin në Ligën e Kampionëve në sezonin e fundit.
Paraqitjet e tij të mira dhe prej një lideri kanë bërë që drejtuesit e klubit t'ia ofrojnë rinovimin lojtarit.
Gjatë ditës së djeshme është mbajtur edhe një takim mes drejtuesve të Interit dhe agjentit të Skriniar.
Sipas gazetës Tuttosport, takimi i Interit me agjentin e Skriniar, Karol Csonto, të enjten ka përfunduar pozitivisht.
Palët thuhet se kanë arritur marrëveshje në parim për rinovimin e kontratës deri në vitin 2023 me kushte të përmirësuara.
Një tjetër takim është planifikuar për muajin e ardhshëm, ku gazeta pret që mbrojtësi i Sllovakisë të vendosë lapsin në letër për një vit shtesë në kontratë.
23-vjeçari momentalisht paguhet rreth 1.5 milionë euro plus bonuse në sezon, ndërsa me kontratën e re do të fitojë 'rreth tre milionë euro' me stimulime të ngjashme në bazë të paraqitjeve. /Telegrafi/