Anëtari i Kryesisë së Lidhjes Demokratike të Kosovës, Alush Gashi me rastin e hapjes së Ambasadës së Republikës së Kosovës në Malajzia, ka kujtuar vizitën dhe takimet e tij gjatë viteve 90-ta, duke thënë se pret me padurim të vizitojë këtë vend miqësor.
Gashi në një postim në Facebook shkruan se në fillim të viteve ’90-ta, pak shtete qëndruan pranë Kosovës aq herët dhe me aq përkushtim sa Malajzia dhe ishte ndër vendet e para që njohu shtetin e Kosovës.
Lexoni të plotë postimin:
Kosova ka hapur zyrtarisht Ambasadën e saj në Kuala Lumpur.
Ky moment më rikthen shumë kujtime. Në fillim të viteve ’90, pak shtete qëndruan pranë Kosovës aq herët dhe me aq përkushtim sa Malajzia. I kujtoj me mirënjohje takimet tona me miqtë malajzianë gjatë asaj kohe vendimtare.
Vizita ime në Kuala Lumpur në prill të vitit 1998, si i ftuar i Qeverisë së Malajzisë — dhe takimi me Kryeministrin Anwar Ibrahim, atëherë Zëvendëskryeministër dhe Ministër i Financave, mbetet një moment i veçantë në kujtesën time.
Kur Kosova shpalli pavarësinë, Malajzia ishte një nga shtetet e para që na njohu.
Me padurim pres të rikthehem në Malajzi — një vend miqësor, me respekt të ndërsjellë dhe lidhje historike të thella — dhe të vazhdojmë forcimin e bashkëpunimit mes dy vendeve tona. /Telegrafi/