Gianni Infantino ka ndërmarrë masa urgjente pasi u akuzua për shantazh nga presidenti i Federatës së Futbollit të Jordanisë.
Presioni ndaj presidentit të FIFA-s vazhdon të rritet pas Kupës së Botës, ndërsa ish-zëvendëspresidenti i FIFA-s dhe presidenti aktual i Federatës Jordaneze të Futbollit, Princi Ali bin Al Hussein, e ka akuzuar indirekt zviceranin se ka mbajtur peng fondet që i takojnë kombëtares së Jordanisë.
Princi Ali pretendon se Federata Jordaneze ende nuk ka marrë shpërblimin financiar nga FIFA për arritjen në finalen e Kupës Arabe të FIFA-s, e zhvilluar dimrin e kaluar.
Në një postim në rrjetet sociale të martën (4 gusht), ai zbuloi se i ishte thënë se duhej të mbështeste publikisht Infantinon, pasi kjo "do të ndihmonte shumë federatën tonë".
Ai gjithashtu foli për problemet serioze që tifozët jordanezë hasën gjatë hyrjes në Shtetet e Bashkuara, pavarësisht se kishin blerë bileta për ndeshjet e Jordanisë në Kupën e Botës.
"Po presim që nga dhjetori shpërblimet financiare për lojtarët tanë për Kupën Arabe në Katar, e cila është një garë e FIFA-s", deklaroi Princi Ali.
Kjo situatë vjen vetëm pak ditë pasi Infantino u detyrua të tërhiqte planin për shitjen e aksioneve në garat e FIFA-s tek investitorë privatë.
Plani u kritikua gjerësisht në mbarë botën, ndërsa UEFA dhe Federata Angleze e Futbollit ishin ndër organizatat që kërkuan rishikim të mënyrës së drejtimit të FIFA-s.
Sipas Sky Sports, të martën në mbrëmje Infantino ka thirrur drejtuesit e lartë të FIFA-s në një takim urgjent, i cili do të mbahet të mërkurën (5 gusht) në Rabat të Marokut.
Infantino, i cili drejton FIFA-n që nga viti 2016, pritet të kandidojë sërish për president në zgjedhjet e vitit 2027./Telegrafi/