Varianti Delta i coronavirusit është tani më dominanti që qarkullon në Francë, tha të mërkurën kryeministri, Jean Castex, duke shtuar se 96 për qind e rasteve të raportuara një ditë më parë ishin midis të pavaksinuarve
"Varianti delta është dominant, është më ngjitës", tha Castex për variantin e zbuluar për herë të parë në Indi.
Kryeministri francez tha se vendi ishte përmbytur me një "valë të katërt" të infeksioneve dhe 18,000 raste të reja u raportuan vetëm dje, raporton france24.
Ministri i Shëndetësisë, Olivier Veran u tha ligjvënësve se numri i përgjithshëm i rasteve ishte rritur me rreth 150 për qind gjatë javës së kaluar si rezultat i përhapjes së shpejtë të variantit Delta, duke përshkruar një rritje të paparë.
Qeveria franceze filloi paraqitjen e një plani të ri për të luftuar COVID-19 me ligjvënësit këtë javë, i cili do të përfshijë kërkimin e një leje shëndetësore në një gamë të gjerë vendesh nga fillimi i gushtit dhe vaksinat e detyrueshme për punonjësit shëndetësorë.
Castex tha se një leje shëndetësore nuk do të kërkohet në shkolla kur viti akademik fillon në muajin shtator. /Telegrafi/