Sot (e hënë) është konfirmuar rikthimi i Roger Federer në krye të ranglistës botërore të ATP.
Zvicerani është bërë mbajtësi më i moshuar i kreut në epokën moderne, me 36 vjet e 279 ditë, pasi Rafael Nadal ka rënë në vend të dytë si pasojë e humbjes nga Dominic Thiem në çerekfinale të Madrid Masters.
Federer, i cili ishte në vend të parë për katër javë më herët gjatë këtij viti, për herë të parë e kishte mbajtur kreun në shkurt të vitit 2004, si 20-vjeçar.
Ai i ka kaluar 309 javë në krye të ranglistës së ATP-së duke u bërë tenisti që e mban më gjatë pozitën numër 1.
Fituesi i 20 titujve Grand Slam do t'i rikthehet lojës në turneun Mercedes Cup më 11 qershor në Stuttgart.
Nadal ka rënë në renditje, pasi mbronte një numër të madh pikësh që i fitoi në vitin e kaluar, kur triumfoi në Monte Carlo, Barcelonë, Madrid dhe French Open - që do të thotë se është dashur ta përsëriste suksesin e vitit të kaluar për ta mbajtur pozitën e tij.
Spanjolli mund ta rimarrë vendin e parë nëse fiton në Rome Masters këtë javë dhe një titull të 11-të të French Open, në turneun që fillon më 27 maj në Paris. /Telegrafi/