Cvejiq: Vuçiq i dha Kurtit 'armë' për ta akuzuar Serbinë për tensionet në Kosovë

Nënkryetari i Partisë së Qendrës Serbe (SRCE), Slobodan Cvejiq, ka reaguar pas marrëveshjes për pranimin e fajësisë nga Igor Popoviq, ndihmësdrejtor në Zyrën për Kosovën në qeverinë serbe, i cili ishte akuzuar për nxitje të urrejtjes ndëretnike gjatë një fjalimi në Rahovec më 18 korrik 2025.

Cvejiq e ka cilësuar këtë zhvillim si dëshmi të qartë të dështimit të politikave të presidentit serb Aleksandar Vuçiq, të cilat, sipas tij, “po shpërthejnë në kulmin e tyre”.

Ai vuri në pah se pranimi i fajësisë për veprën penale të “nxitjes së përçarjes dhe intolerancës”, që në fillim ishte mohuar nga Popoviq, tregon për një kthesë të çuditshme që, sipas tij, mund të shpjegohet vetëm me dy skenarë.

“Sipas të gjitha gjasave, Popoviq kuptoi se nuk mund të mbështetej më në regjimin e Vuçiqit, i cili më parë do ta kishte mbrojtur nëse ai do të vazhdonte të përhapte propagandën e tij. Prandaj, zgjodhi rrugën më të shkurtër për t’u kthyer në liri me ndihmën e avokatit të tij. Ose, skenari tjetër, është se Vuçiq vetë, përmes Popoviqit, i dha Kurtit një argument të fortë – edhe nëse i pavërtetë – për të akuzuar Serbinë se po ndez tensione në Kosovë,” deklaroi Cvejiq.

Duke e krahasuar këtë me debaklin e Banjskës, Cvejiq theksoi se nuk ka rëndësi nëse bëhet fjalë për paaftësi apo një veprim të qëllimshëm që përfiton politikisht Albin Kurti – rezultati është i njëjtë: një tjetër goditje për pozitën e Serbisë në negociatat ndërkombëtare.

“Ky grup i gëzuar i SNS-së vetëm sa e ka dobësuar më tej pozicionin negociues të Serbisë për çështjen e Kosovës,” tha ai.

Cvejiq theksoi se për serbët që jetojnë në Kosovë është më mirë që askush që ka lidhje me Vuçiqin “qoftë edhe në imagjinatën e tij, të mos përmendë fare Kosovën dhe të mos e mbrojë popullin tonë atje”.