Pritjes së tifozëve të Paris Saint-Germainit i ka ardhur fundi. Lionel Messi ka debutuar me klubin e ri.
Superylli argjentinas ishte kryetemë në botën futbollit me vendimin e tij për t’u larguar nga Barcelona dhe për t’u transferuar në Parc des Princes.
Kalimi i tij te klubi francez u përshkrua me bujë të madhe, mirëpo tifozët është dashur të presin deri sot (e diel) për debutimin e tij.
Trajneri Mauricio Pochettino e la në bankën rezervë në pjesën e parë, ndërsa nuk vendosi ta inkuadronte menjëherë në pjesën e dytë.
Kur Messi u ngrit për ta bërë nxehjen, tifozët e pranishëm në Stade Auguste Delaune filluan brohoritjet në mbështetje të tij duke e bërë të qartë se e donin në fushë.
Dhe ashtu ndodhi. 34-vjeçari u inkuadrua në fushë në minutën e 66-të, në vend të Neymar, duke nisur kështu aventurën e re, për herë të parë në karrierën profesionale me fanellën e një klubi që nuk është Barcelona. /Telegrafi/
