BE do të rrisë sigurinë e hebrenjve në Evropë

Komisioni Evropian dënoi "ata që po importojnë" luftën në Gaza në Evropë dhe do të "rrisin" mbrojtjen e qytetarëve hebrenj, tha një zëdhënës i Komisionit për Euronews.

Komisioni reagoi ndaj një letre të kohëve të fundit të dërguar nga më shumë se 100 rabinë evropianë drejtuar presidentes Ursula von der Leyen, duke e paralajmëruar atë se që nga sulmi i udhëhequr nga Hamasi më 7 tetor kundër Izraelit, Evropa po përballej me "urrejtje të thellë antisemite" dhe "masat e shtuara të sigurisë" ishin "urgjentisht" të nevojshme.

Komentet vijnë gjithashtu pasi Belgjika dëshmoi akte të paprecedentë të dhunës antisemite dhe pasi një shitës gjerman postoi një shënim që u ndalonte hebrenjve të hynin në dyqanin e tij, duke shkaktuar zemërim.

"Ne shohim një rritje shqetësuese të antisemitizmit, një trend që është plotësisht i pajustifikueshëm", tha zëdhënësi i Komisionit, duke shtuar: "Ne qëndrojmë fort kundër të gjitha formave të antisemitizmit. Populli hebre duhet të ndjehet i sigurt në të gjithë Evropën."

Zëdhënësi tha se forcimi i sigurisë së popullit hebre do të ishte një "prioritet" për Komisionin.

Ndryshe, sipas UNIA-s, institucionit publik të pavarur të Belgjikës që promovon barazinë dhe lufton diskriminimin, 277 persona sinjalizuan akte antisemite dhe u hapën 79 hetime në vitin 2024, krahasuar me 59 në vitin 2023.

Komisioni ka një koordinator për luftimin e antisemitizmit dhe miratoi "Strategjinë e BE-së për luftimin e antisemitizmit dhe nxitjen e jetës hebraike" të parën në vitin 2021.

Por situata e sigurisë është përkeqësuar dhe shumë shtete anëtare kanë masa kombëtare për të luftuar antisemitizmin.

Ndër masat urgjente, rabinët Evropianë përmendin nevojën për "masa të shtuara sigurie" në vendet e adhurimit dhe lagjet hebraike; një mekanizëm raportimi online që gjurmon incidentet e antisemitizmit, si dhe trajnim specifik për oficerët e policisë "për të rritur ndërgjegjësimin se si të identifikojnë dhe trajtojnë saktë incidentet antisemite dhe antisioniste, si dhe shkelësit që i kryejnë ato". /Telegrafi/