Në kuadër të promovimit të kuzhinës italiane anembanë botës, Ambasadori Italian në Kosovë, Antonello De Riu, ka bërë një vizitë të veçantë në restorantin Il Gusto, që gjendet në qendrën tregtare Prishtina Mall. Vizita e ambasadorit De Riu në Il Gusto simbolizon rëndësinë që Italia i atribuon përhapjes së vlerave të saj gastronomike dhe kulturore në Kosovë.
Il Gusto, i njohur për ofrimin e një gamë të larmishme të pjatave italiane, nga pasta dhe pizza deri te risotto dhe desertet e shijshme, u bë vendi ku ambasadori foli për rëndësine e "Javës së Kuzhinës Italiane në Kosovë". Ky event, i cili zhvillohet nga data 13 deri më 19 nëntor, është organizuar nga Ambasada e Italisë në Prishtinë në bashkëpunim me Agjencinë ICE, me qëllim promovimin e ushqimit dhe verës italiane.
Javës së Kuzhinës Italiane në Kosovë i dedikohet jo vetëm ekspozimi i shijes dhe diversitetit të kuzhinës italiane, por edhe edukimit rreth shëndetit dhe dietës mesdhetare. Në këtë kontekst, do të ketë prezencën e profesorëve dhe studentëve nga një institut prestigjioz i Romës, të cilët do të organizojnë "darka me autorësi" dhe seanca të "show cooking"-ut. Kjo javë përfshin gjithashtu trajnime praktike në gastronomi për të rinjtë dhe profesionistët kosovarë, duke iu mundësuar atyre të mësojnë nga ekspertë të fushës.
Gjatë vizitës së tij nëIl Gusto, ambasadori De Riu e vlerësoi këtë restorant si një shembull të shkëlqyer të asaj se si kuzhina italiane mund të integrohet në kulturën dhe preferencat e konsumatorëve kosovarë. Ai gjithashtu theksoi lidhjen e fortë ndërmjet ushqimit mesdhetar dhe mirëqenies, duke vënë në dukje suksesin dhe cilësinë e produkteve italiane të ushqimit që janë të njohura në mbarë botën.
