Alexei Navalny zhvendoset në një burg tjetër, ende nuk dihet vendndodhja e tij

Lideri opozitar rus Aleksei Navalny raportohet se do ta vuajë dënimin në një burg në afërsi të Moskës, kanë raportuar mediet ruse, edhe pse aleatët e tij thonë se ende nuk e dinë vendndodhjen e tij.

Agjencia e lajmeve TASS ka raportuar se Navalny është dërguar në rajonin Vladimir, ku ai do të vuajë dënimin në një burg në qytetin Pokrov, që gjendet 100 kilometra në lindje të Moskës.

TASS ka cituar një burim anonim të ketë thënë se Navalny është dërguar në këtë rajon më 26 shkurt dhe tani gjendet në karantinë. Megjithatë, ky burim nuk ka treguar se nëse ai tashmë gjendet në burg.

Më herët, agjencia Yarnovoski ka raportuar se Navalny është në një qendër paraburgimi në Kolchugino në rajonin e Vladimirit dhe më pas do të transferohet në burgun në Porkov.

Shërbimi i Burgjeve në Rusi ka konfirmuar se Navalny është transferuar nga qendra e paraburgimit në Moskë në një burg. Por, ky shërbim nuk ka treguar se ku kritiku i Kremlinit do të vuajë dënimin prej dy vjet e gjysmë burgim.

Lexo po ashtu Alexei Navlany zhvendoset në një burg jashtë Moskës

Ivan Zhdanov, drejtor i Fondacionit anti-Korrupsion të Navalnyt, tha se ai është dërguar në një “burg të ashpër”, por tha se ende nuk kanë informacione të sakta se ku gjendet ai.

Autoritetet ruse zakonisht nuk japin informacione lidhur me transferimin e të burgosurve derisa ata të arrijnë destinacionin e tyre.

Navalny u arrestua në janar në një aeroport të Moskës pasi arriti nga Gjermania, ku ai u trajtua për helmimin me agjentin nervor Novichok.

Rusia mohon se ka qenë e përfshirë në helmim, por Navalny ka thënë se ky helmim është urdhëruar nga presidenti, Vladimir Putin.

Një gjykatë në Moskë, në muajin shkurt mori vendim se Navalny ka shkelur kushtet e lirimit të tij, lidhur me një rast të mëparshëm për keqpërdorim fondesh. Navalny thotë se ky rast ka qenë i motivuar politikisht. Ai u dënua me dy vjet e gjysmë burgim.

Lexo po ashtu 'Prapa skenave të protestës' - si hetuesit rusë po e luftojnë lëvizjen opozitare të Alexei Navalnyt në rrjete sociale?

Dënimi i Navalnyt nxiti protesta mbarëkombëtare.

Bashkimi Evropian ka thënë se po shqyrton mundësinë e vendosjes së sanksioneve të reja ndaj Rusisë për shkak të rastit të Navalnyt dhe e ka kritikuar Moskën se nuk ka respektuar një vendim të Gjykatës Evropiane për të Drejtat e Njeriut që ka kërkuar lirimin e tij. /REL/