Albulena Haxhiu angazhon avokat, do ta padis Besnik Berishën për “shpifje dhe fyerje”

Avokati Besnik Berisha disa ditë më parë në një intervistë foli rreth arrestimit të tij ku hodhi akuza ndaj prokurorit Rasim Malokut, por edhe ndaj ministres së Drejtësisë, Albulena Haxhiut.

Nasuf Hasani, avokat, përmes një postimi në Facebook, ka njoftuar se është angazhuar nga Albulena Haxhiu, për të paditur Besnik Berishën për shkak të deklaratave të tij.

“Ju njoftoj se jam autorizuar nga Ministrja e Drejtësisë, znj. Albulena Haxhiu që ta përfaqësojë në Gjykatën Themelore të Prishtinës sa i përket paraqitjes së padisë për kompensim dëmi kundër Besnik Berisha, e cila bazë kontesti ka shpifjen dhe fyerjen”, ka shkruar Hasani.

Lexo po ashtu Lirohet avokati Besnik Berisha

Avokati i Haxhiut më tutje ka ftuar Berishën  t’i prezantojë provat që dëshmojnë se Ministrja Haxhiu e paska urdhëruar Prokurorin Rasim Maloku që ta arrestojë të njëjtin.

“Nga sa u njoftuam përmes mediave, z. Berisha paska thirrur nesër një Konferencë, ku e shfrytëzoj rastin ta ftoj të njëjtin që t’i prezantojë provat që dëshmojnë deklaratën e tij të mbrëmshme se Ministrja Haxhiu e paska urdhëruar Prokurorin Rasim Maloku që ta arrestojë të njëjtin”.

“Në të kundertën, nëse i njëjti nuk e tërheq atë deklaratë nesër dhe nëse nuk kërkon falje, le të përgatitet për betejë ligjore”, ka deklaruar tutje Hasani./Telegrafi/