Alarmi është ngritur në nivelin më të lartë pas shpërthimit të vullkanit Semeru në Indonezi

Mali Semeru i Indonezisë “shpërtheu” të dielën duke hedhur re të nxehta hiri qindra metra në qiell, duke bërë që autoritetet të rrisin gjendjen e alarmit të vullkanit në nivelin më të lartë.

Dhe sipas mediave të huaja, përcjell Telegrafi, shpërthimi i malit më të lartë në ishullin kryesor Java të Indonezisë rreth 800 kilometra në juglindje të kryeqytetit Xhakarta shkaktoi evakuime të fshatrave aty pranë.

Niveli i rritur i kërcënimit “do të thotë se rreziku ka kërcënuar vendbanimin e njerëzve dhe aktiviteti i vullkanit është përshkallëzuar”, ka thënë zëdhënësja e Qendrës për Zbutjen e Fatkeqësive të Vullkanologjisë dhe Gjeologjike (PVMBG), Hendra Gunawan.

“Agjencia japoneze e motit paralajmëroi se një cunami mund të arrijë në ishujt Miyako dhe Yaeyama në prefekturën jugore të Okinawa”, raportoi agjencia e lajmeve Kyodo.

Nuk u raportuan viktima apo lëndime menjëherë pas shpërthimit, por Gunawan paralajmëroi banorët aty pranë që të mos udhëtonin brenda tetë kilometrave (pesë milje) nga krateri pasi niveli i kërcënimit u ngrit në katër.

Mali Semeru shpërtheu për herë të fundit saktësisht një vit më parë, duke vrarë të paktën 51 njerëz.

Fatkeqësia la rrugë të tëra të mbushura me baltë dhe hi, duke gëlltitur shtëpi dhe automjete, me afro 10,000 njerëz që kërkonin strehim.

Indonezia ndodhet në Unazën e Zjarrit të Paqësorit, ku takimi i pllakave kontinentale shkakton aktivitet të lartë vullkanik dhe sizmik. Kombi i arkipelagut të Azisë Juglindore ka rreth 130 vullkane aktive. /Telegrafi/