Akuza e kapitenit: Nuk jam lojtar që ulem në bankë, trajneri ka kërkuar largimin tim

Driton Krasniqi ka sqaruar ekskluzivisht për Olle, arsyet e largimit nga bankina për në tribuna në ndeshjen e Kupës, mes Prishtinës dhe Istogu.

Kapiteni bardhekaltër, konfirmon atë që është shkruar në Olle se nuk ka pranuar të qëndrojë në bankinë, pasi sipas tij nuk është lojtar që meriton të jetë në atë vend.

“Nuk jam unë nga ata lojtarë që ulem në bankë. Për të mirë të ekipit jo në bankë, por nëse është nevoja dal edhe në tribuna. Problemi është te respekti ndaj meje në radhë të parë, sepse jam kapiten i ekipit, në radhë dytë se kam 8 vite karrierë në Prishtinë, në radhë të tretë kam shumë trofe, nuk e di saktë por vetëm me Prishtinën besoj se janë 10 minimumi. Në radhë të katërt kam edhe disa ndeshje në Europa Ligë, edhe atë si kapiten i Besës së Kavajës etj, dhe të vijë një trajner si Sermaxhaj, pa asnjë arsyetim të më nxjerrë prej ekipit, nuk është korrekte. Ky është shkaku pse nuk isha atë ditë në bankën rezervë”, ka deklaruar Krasniqi për GazetaOlle.com

Sipas tij, trajneri Sami Sermaxhaj ka kërkuar që ai të largohet nga skuadra.

“Gjithashtu Sermaxhaj ka kërkuar që unë të largohem nga ekipi, gjë që e kam vërejtur edhe më herët sepse ai ka ardhur me një qëllim të caktuar nga fillimi që të na largoj disa lojtarëve prej klubi, që kemi derdhur shumë djersë aty, arsyen e dinë ai vetë, ndoshta është i ndikuar edhe nga dikush tjetër, por unë nuk do t’i japë atë kënaqësi”, shtoi kapiteni.

Ai ka zbuluar edhe dy ofertat e orëve të fundit, nga skuadrat që po e kërkojnë titullin.

“Kam pasur në orët e fundit dy oferta shumë serioze nga Gjilani dhe Feronikeli që i falënderoj shumë Afrim Tovërlanin dhe Bylbyl Sokolin, që më kanë ofruar kontrata shumë të mira. Do ta respektoj kontratën që kam me Prishtinën deri në fund dhe mendoj që karrierën do ta mbylli në Prishtinë. Në qershor do të ulem me kryesinë e klubit dhe do të vendosim çka do të bëhet me mua”.

Driti po ashtu ka zbuluar bisedën telefonike me Sermaxhajn. “Arsyja e fundit e Sermaxhajt në lidhje telefonike ishte se kinse lojtarët të cilët i kam futur në formacion janë të dëshmuar që për mua kjo është një arsye shumë banale, sepse dihet se çfarë karriere kam unë”, tha në fund ai.

Prishtina kishte mposhtur Istogun 5:1. /Olle