Ahmeti: Modeli aktual me gjashtë njësi zgjedhore është më i përshtatshëm

Kryetari i Bashkimit Demokratik për Integrim, Ali Ahmeti, konsideron se modeli aktual me gjashtë njësi zgjedhore është më i përshtatshëm se modeli me një njësi zgjedhore.

Sipas Ahmetit, ndryshimi i Kodit Zgjedhor dhe njësive zgjedhore kërkon një konsensus dhe harmonizim më të gjerë me të gjithë faktorët politikë në vend dhe kjo çështje duhet të diskutohet në Kuvend.

Kështu ka thënë njeriu i parë i BDI-së në takimin që ka pasur sot me ambasadorin e Mbretërisë së Spanjës, Jose Luis Lozano Garcia.

Në takim të dy diskutuan gjithashtu për mosmarrëveshjen me Bullgarinë, si dhe për vettingun e politikanëve, gjyqtarëve dhe prokurorëve.

Ahmeti dhe Garcia konstatuan se zgjedhjet nuk janë zgjidhje për momentin sepse vendi po ecën përpara dhe se procesi integrues nuk duhet të bllokohet dhe zgjidhja e të gjitha mosmarrëveshjeve me vendet fqinje është pozitive për Republikën e Maqedonisë së Veriut në anëtarësimin në familjen e madhe evropiane.

Gjatë bisedës Ahmeti e informoi ambasadorin spanjoll Garcia për dinamikën e re të bisedimeve për zgjidhjen e kontestit me Bullgarinë, vizitat në Shkup dhe Sofje, vendosjen e dialogut dhe planit të veprimit të grupeve punuese dhe vullnetin e mirë politik për zgjidhjen e çështjeve të hapura dhe të pranuara nga të dyja palët./Telegrafi/