Ahmeti: BE-ja ta ndërprejë heshtjen ndaj politikës së Serbisë kundër serbëve në Kosovë

Deklaratat e presidentit serb, Aleksandar Vuçiq për largimin e serbëve nga Ushtria e Kosovës, i ka kundërshtuar bashkë-kryesuesi i ekipit negociator, Shpend Ahmeti.

Nëpërmjet një postimi në rrjetin social Facebook, Ahmeti ka kërkuar nga BE-ja që ta ndërpresë heshtjen ndaj politikave të Serbisë, kundër serbëve në Kosovë.

Ai ka thënë se BE-ja nuk reagoi as ndaj akuzave të Gjuriqit për ministren e re të Bujqësisë, transmeton Telegrafi.

“Po dhuna politike e Serbisë shtetërore kundër (integrimit të) serbëve të Kosovës bëhet edhe më e drejtpërdrejtë kur Marko Gjuriqi ushtron sot presion të drejtpërdrejtë shtetëror ndaj ministres së re të Kosovës për Bujqësi, Dijana Zhiviq, me gjuhën e njëjtë të Millosheviqit, që “bashkëpunimi i serbëve me institucionet e Kosovës qenka veprim kundër interesave të kombit serb”. Përsëri asnjë reagim nga Brukseli”, ka shkruar Shpend Ahmeti.

Postimi i plotë:

BASHKIMI EVROPIAN TA NDËRPREJË HESHTJEN NDAJ POLITIKËS SË SERBISË KUNDËR SERBËVE TË KOSOVËS

Përderisa Beogradi zyrtar e ka dinamizuar aktivitetin e tij politik kundër integrimit të serbëve të Kosovës, Bashkimi Evropian vazhdon heshtjen.

Presidenti i Serbisë, Aleksandër Vuçiqi ka inkurajuar sot serbët e Kosovës të mos përfshihen në institucionet e Kosovës, si dhe të dalin nga ushtria e Kosovës e cila sipas tij “shërbimin e vetëm që mund ta kryejnë është vrasja e serbëve”. Me sa duket përvoja e tij në Bosnje dhe në Kosovë po e ridëshmon doktrinën e tij për ushtrinë, kur ushtria “jugosllave” vriste shtetasit e saj, me mbështetjen dhe bekimin politik të partisë së atëhershme të Vuçiqit. Kritika e vetme e tyre ishte se ajo nuk ishte mjaft “efikase”.

Nga ana e saj, kryeministres së Serbisë, Ana Bërnabiq që i rikujton shqiptarëve se “jemi në shekullin XXI”, po i mungon vetëm edhe citimi i “babait të kirurgjisë serbe“, Vladan Gjorgjeviqit, për “shqiptarët me bisht”.

Po dhuna politike e Serbisë shtetërore kundër (integrimit të) serbëve të Kosovës bëhet edhe më e drejtëpëdrejtë kur Marko Gjuriqi ushtron sot presion të drejtëpëdrejtë shtetëror ndaj ministres së re të Kosovës për Bujqësi, Dijana Zhiviq, me gjuhën e njëjtë të Millosheviqit, që “bashkëpunimi i serbëve me institucionet e Kosovës qenka veprim kundër interesave të kombit serb”.

Përsëri asnjë reagim nga Brukseli.

Emërimi i Dijana Zhiviqit, si grua dhe si pjesëtare e komunitetit serb të Kosovës, është për t’u përshëndetur. Ajo, si dhe çdo qytetar që dëshiron të jetojë në paqe dhe të bashkëjetojë në harmoni me qytetarët e përkatësive të ndryshme etnike në Kosovë duhet të mbrohet nga institucionet dhe shoqëria jonë kundër presioneve të qeveritarëve të Serbisë.

Ministrja e re e Bujqësisë e Republikës së Kosovës duhet të mbrohet nga Qeveria e Serbisë dhe të gjykohet vetëm se mbi performansën e politikat e saj në sektorin e bujqësisë. /Telegrafi/