Ahmeti iu bën thirrje bizneseve që janë përfituese të granteve që të plotësojnë dokumentet

Kryetari i Komunës së Prishtinës, Shpend Ahmeti iu ka bërë thirrje të gjitha bizneseve përfituese të grantit për bizneset e prekura nga pandemia COVID-19 që të dorëzojnë të dokumentacionet e plotësuara për përfitim të këtyre granteve.

Sipas tij, bizneset duhet ta dorëzojnë dokumentacionin në sportelet e Komunës.

“Të gjitha bizneset përfituese të grantit për bizneset e prekura nga pandemia COVID-19 e kanë obligative të i dorëzojnë të fotokopjuara qartë e të e plotësojnë dokumentacionin duke dorëzuar: Leternjoftimin valid, kopje në të dy anët, Konfirmimin e llogarisë bankare në emër të biznesit, Certifikatën e re të biznesit (që ka numrin unik identifikues ku fillon me 81 dhe është 9 shifror). Dokumentacioni do të dorëzohet në sportelet në katin përdhese të ndërtesës së vjetër të Komunës. Në mënyrë që të shmangim tollovitë dhe respektojmë masat mbrojtëse për COVID-19, bizneset do të duhet të dorëzojnë dokumentacionin e kërkuar sipas orarit të caktuar në link, në të kundërtën nuk mund t’a bëjmë pranimin e dokumenteve. Për pranim do të përkujdeset ekipi i zyrtarëve komunal”, njofton Ahmeti. /Telegrafi/

Ditë më parë, ai kishte njoftuar më shumë se 7 mijë mikro-biznese dhe biznese të vogla kanë aplikuar në fondin 5 milionësh të Komunës.

“Fondi do të ndahet në shuma të barabarta për dy nivele (grant më i vogël për mikro bizneset). Lista do të publikohet shumë shpejtë dhe do të procedohet në Thesar për ekzekutim. Numri i madh i aplikimeve tregon për ndikimin ekonomik të pandemisë. 5 milion është pak por është maksimumi i mundësive tona si komunë”, kishte njoftuar ai.

Lexo po ashtu Publikohet lista e bizneseve që kanë fituar grante nga Komuna e Prishtinës

Kurse, numri i bizneseve përfituese sipas Ahmetit është 4,941, prej tyre 1,976 mikro-biznese me nga 600 euro dhe 2,965 biznese te vogla me nga 1,300 euro.

“Lista e publikuar dhe përfituesit janë përcjell në Thesarin e Kosovës – Ministrinë e Financave. Fondet janë nga buxheti i Komunës së Prishtinës dhe si institucion kemi përfunduar të gjitha procedurat dhe tashmë presim procedimin e ekzekutimit të pagesave nga Thesari”, kishte njoftuar Ahmeti. /Telegrafi/