Në një takim të mbajtur sot me strukturat e degës së Aleancës për Ardhmërinë e Kosovës në Junik, u bë zyrtarizimi i kandidaturës së Agron Kuçit për kryetar të Komunës së Junikut.
Në profilin e tij në Facebook, Haradinaj tha se Kuçi më herët ka udhëhequr Junikun me përkushtim, vizion dhe rezultate të prekshme.
Nën drejtimin e tij, Juniku është shpallur disa herë si komuna me performancën më të mirë në Kosovë, ndërsa vetë Kuçi është vlerësuar si një nga kryetarët më të suksesshëm në nivel vendi.
“Banorët e Junikut kanë dëshmuar gjithmonë pjekuri politike dhe dinë ta vlerësojnë punën e mirë. Me mbështetjen e tyre, Junikut do t’i kthehet qeverisja që e meriton”, deklaroi Haradinaj.
Ai shtoi se komunat ku udhëheq Aleanca janë shembull i qeverisjes së mirë, të ndershme dhe të përgjegjshme, dhe se Juniku do të jetë sërish pjesë e këtij modeli.
