Agjencia e Punësimit të Kosovës: Vetëm gjatë prillit u regjistruan 32 mijë të papunë të ri

Mbi 32 mijë punëtorë kanë mbetur pa punë vetëm gjatë muajit prill. Të dhënat konfirmohen nga Agjencia e Punësimit të Kosovës.

Fadil Osmani nga Agjencia e Punësimit të Kosovës ka thënë për RTV Dukagjinin ka thënë se mbi 122 mijë persona janë të regjistruar si të papunë.

“Mund të them se vetëm gjatë muajit prill janë paraqitur si të papunë të ri 32 mijë persona ndërsa mbi 13 mijë rikativizime janë bërë për të papunët pasiv”, tha ai, përcjell Telegrafi.

Zyrtari nga Agjencia e Punësimit të Kosovës thotë se në kohe pandemia është shtuar fluksi i qytetarëve në zyrat e agjencioneve që janë anë e mbanë Kosovës.

“Një nga kategoritë përfituese nga pako emergjente kriter e kanë të jenë të regjistruar si të papunë dhe të mos kenë të hyra nga buxheti i Kosovës”.

Osmani thotë se zyrtarët nga zyrat e punësimit e kanë për obligim t’i udhëzojnë qytetarët si të aplikojnë pasi sipas tij jo të gjithë qytetarët dinë të aplikojnë përmes sistemit online.

Ai thotë se nuk kanë nevojë të shkojnë në zyre të gjithë anëtarët e familjes pasi sipas tij vetëm një anëtarë mund të përfitojë dhe më kusht që të jetë i papunë e të mos ketë ndonjë ndihmë sociale apo pension./Telegrafi/