Afati i fundit për aplikim në“Youth Film Fest” po afrohet

Data 10 Dhjetor është afati i fundit për të aplikuar në edicionin e dytë të Festivalit e Filmit për të Rinj (Youth Film Fest) i cili organizohet nga Këshilli Rinor i Ambasadës Amerikane dhe Innovation Centre Kosovo (ICK).

Temat për këtë vit janë: Fuqizimi i të Rinjve, Gratë në Biznes, Ambienti, Teknologjia dhe Shoqëria, ndërsa të drejtë aplikimi kanë të gjithë të rinjtë nga Kosova të moshës16 deri në 30 vjeç, të cilët shfaqin interesim në fushën e filmit, apo dëshirojnë të paraqesin pikëpamjet e tyre në lidhje me temat e përzgjedhura.

Të gjithë të interesuarit mund të marrin informata, të aplikojnë në web faqen e festivalit www.youthfilmfest-ks.org dhe të bëhen pjesë e garës për t’u shpërblyer me çmime të ndryshme. Kohëzgjatja e filmit duhet të jetë prej 3-40 minuta, ndërsa në rast se filmat janë prodhuar më herët, nuk duhet të jenë më të vjetër se 2 vite. Pas regjistrimit në web faqe, aplikuesit duhet të dorëzojnë DVD-në bashkë me konfirmimin e regjistrimit, në zyrat e Innovation Centre Kosovo (ICK), Rr. Rexhep Mala 28A, Prishtinë.

Youth Film Fest synon të angazhojë të rinjtë në fushën e filmit dhe njëkohësisht edhe t’i kontribuojnë vendit duke promovuar anët pozitive, zhvillimin e përgjithshëm, mirëqenien dhe inovacionin.

Shfaqja e filmave dhe ceremonia e ndarjes së shpërblimeve mbahet më 17 Dhjetor, në Modelariumin e Fakultetit të Arkitekturës në Prishtinë. Aktiviteti organizohet nën patronatin e ambasadorit amerikan në Kosovë, Greg Delawie.

Një festival i profilit të tillë është i pari dhe i vetmi që organizohet në Kosovë e qe është përkrahur fuqishëm nga festivalet tjera dhe organizata të shumta në vend. Filmi fitues i këtij edicioni do të jetë pjesëmarrës në Pri Film Fest 2017.

Për herë të parë ky festival u organizua ne vitin 2015, me temën “Kosova Ime”.