AAK optimiste për zgjedhjet në veri, LDK thotë se Thaçi po i shërben koalicionit qeverisës

Me 19 maj qytetarët në katër komunat veriore, Mitrovicë e Veriut, Zubin Potok, Leposaviq dhe Zveçan, pritet t’i drejtohen kutive të votimit për të votuar për kryetarin e ardhshëm të tyre.

Partia e Kryeministrit Haradinaj, Aleanca për Ardhmërinë e Kosovës, pritet t’i hyjë garës në zgjedhjet e jashtëzakonshme në këto katër komuna.

Nënkryetari i AAK-së, Pal Lekaj, tha për Telegrafin se në dy ditët e ardhshme pritet t’i dërgojnë në KQZ, kandidatët për certifikim.

Lexo po ashtu Presidenti shpall zgjedhjet për kryetarë në katër komunat veriore

“Zgjedhjet janë proces demokratik i legjitimitetit të faktorit politik e vendimmarrës, prandaj edhe ne si Aleancë për Ardhmërinë e Kosovës, do të marrim pjesë në procesin zgjedhor që do të organizohet në veri të Mitrovicës. Nesër ose të enjten pritet t’i dërgojmë në KQZ, kandidatët për certifikim”, tha Lekaj.

Lekaj, u shpreh i bindur se me platformën që do t’ia ofrojnë qytetarëve në pjesën veriore, ata do të jenë faktor për të shtyrë proceset përpara.

“Do ofrojmë platformën tonë për këtë pjesë të vendit, dhe besojmë që do të arrijmë të jemi faktori për të shtyrë përpara procese edhe në ketë pjesë të Kosovës, ashtu siç po ndodhë në tërë Kosovën nga Qeveria Haradinaj”, ka thënë ai.

Ndryshe nga Lekaj, deputetja nga partia në opozitë, Besa Gaxherri (LDK), thotë se vendimi i presidentit Hashim Thaçit, për shpalljen e zgjedhjeve të jashtëzakonshme në veri është vetëm një lëvizje e qëllimshme, dhe që nuk pret asgjë që të shkon sipas rregullave ligjore.

“Këto vendimet e domosdoshme që duhet me ndodhë janë spekulime, ose lëvizje të qëllimshme të koalicionit qeverisë. Të cilat presidenti ndonjëherë është në shërbim të koalicionit, e ndonjëherë kundërshtar, qoftë edhe kundër kryeministrit edhe kryetarit të PDK-së. Pra, ne këtu nuk shohim asgjë që vërtetë procedohet e shkon sipas rregullave ligjore. Çdo gjë kalkulohet për qëllime të caktuara politike, personale e grupore”, deklaroi Besa Gaxherri për Telegrafin.

Telegrafi, ka tentuar të marrë edhe një përgjigje nga Vetëvendosje rreth zgjedhjeve të jashtëzakonshme në veri, por ata nuk iu janë përgjigjur thirrjeve të redaksisë.

Kujtojmë se, presidenti i Kosovës Hashim Thaçi ka marrë vendim që të shpall zgjedhjet e jashtëzakonshme për komunat, Mitrovicë e Veriut, Zubin Potok, Leposaviq dhe Zveçan, pasi kryetarët e tyre dhanë dorëheqje të parevokueshme.

Lexo po ashtu KQZ vendos për ndarjen e mjeteve për fushatën zgjedhore në katër komunat veriore

Zgjedhjet e jashtëzakonshme  për komunat veriore do të mbahen më 19 maj./Telegrafi/