63 vjeçari në Tiranë dyshohet për abuzim me djem të mitur, Policia në kërkim të tij

Policia e Shtetit ka njoftuar se ka shpallur në kërkim 63 vjeçarin në Tiranë, i cili dyshohet se ka abuzuar me djem të mitur.

Lidhur me rastin, Policia thotë se po punohet për kapjen e tij, transmeton Telegrafi.

“Në lidhje me një video të postuar mbrëmjen e djeshme në emisionin investigativ ‘Piranjat’, për një shtetas që dyshohet se ngacmon seksualisht shtetas të mitur si dhe që kishte abuzuar seksualisht me një prej tyre, ju sqarojmë se: më datë 08.08.2023, specialistët për Hetimin e Krimeve të Komisariatit të Policisë Nr. 3 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, në ngarkim të shtetasit P. M., 63 vjeç, banues në Tiranë, për veprën penale ‘Marrëdhënie seksuale ose homoseksuale me të mitur’.
Në vijim të veprimeve është bërë shpallja në kërkim e shtetasit P. M., dhe po punohet për kapjen e tij”, njofton Policia.

Drejtoria Vendore e Policisë Tiranë falënderon mediat dhe qytetarët që denoncojnë rastet e paligjshmërisë dhe i fton sërish që të denoncojnë çdo rast paligjshmërie në Komisariatin Digjital dhe në numrin 112, duke iu garantuar reagim të menjëhershëm e të paanshëm.

Videon mund ta shikoni duke klikuar KËTU. /Telegrafi/