Më 31 korrik pati persona të armatosur në veri, EULEX: Forca e reagimit të shpejtë në gatishmëri, nëse është e nevojshme mund të vendosim njësi policore shtesë  

EULEX-i ka konfirmuar sot se në trazirat e 31 korrikut në veri të vendit ka pasur persona të armatosur, në kohën kur u vendos reciprocitet me Serbinë në çështjen e targave dhe dokumenteve.

Zyra për media e EULEX-it në një përgjigje për Telegrafin bën të ditur se EULEX-i i shtoi më pas patrullat e veta zbuluese në veri të Kosovës dhe fatmirësisht nuk ka hasur në një prani të ngjashme që atëherë.

Nga EULEX-i po ashtu bëjnë të ditur se Forca e tyre e reagimit të shpejtë është në gatishmëri dhe nëse është e nevojshme mund të vendosin njësi policore shtesë.

Lexoni të plotë përgjigjen e EULEX-it dhënë për Telegrafin:

EULEX-i ka monitoruar nga afër të gjitha zhvillimet që mund të ndikojnë në sigurinë e Kosovës, si dhe në sigurinë e të gjitha komuniteteve në Kosovë. Njësia jonë e Formuar Policore, e cila përbëhet nga 105 policë, po kryen patrullime ditore në veri të Kosovës për të rritur vetëdijen tonë për situatën.

Më 31 korrik, EULEX-i vuri në dukje një prani të armatosur, të konsiderueshme dhe shqetësuese në barrikadat e ngritura në veri të Kosovës.

Si përgjigje, EULEX-i i shtoi më tej patrullat e veta zbuluese në veri të Kosovës dhe fatmirësisht nuk ka hasur në një prani të ngjashme që atëherë.

Si reaguesi i dytë i sigurisë së Kosovës, EULEX-i mban koordinim të ngushtë me Policinë e Kosovës dhe me KFOR-in, përkatësisht reaguesin e parë dhe të tretë të sigurisë në Kosovë.

Nëse kërkohet nga Policia e Kosovës, EULEX-i është i gatshëm të veprojë me vendosmëri si reagues i dytë i sigurisë për të de-përshkallëzuar tensionet dhe për të mbrojtur këdo nga çfarëdo kërcënimi – pa marrë parasysh përkatësinë etnike, moshën apo gjininë.

“Forca jonë e Reagimit të Shpejtë” është në gatishmëri 24 orë në ditë në Mitrovicë dhe i nevojitet kohë shumë e shkurtër e reagimit. Nëse është e nevojshme, Misioni mund të vendosë një njësi policore shtesë të formuar nga rezerva për të rritur më tej forcat e saj në terren dhe kapacitetin operacional.

Për të testuar gatishmërinë operacionale dhe për të siguruar koordinim të ngushtë të të gjithë reaguesve të sigurisë, EULEX-i, KFOR-i dhe Policia e Kosovës kryejnë stërvitje të rregullta të përbashkëta.

Siguria e grave, burrave, vajzave dhe djemve nga të gjitha komunitetet në Kosovë është prioriteti kryesor i EULEX-it dhe ne do të bëjmë atë që është e nevojshme dhe çfarë duhet për të mbështetur stabilitetin e Kosovës dhe për të kontribuar në sigurinë e popullatës së saj. /Telegrafi/