25 vjetori i themelimit: Policia e Pejës organizon “Portën e Hapur” dhe mirëpret nxënësit

Policia e Pejës ka shënuar sot një përvjetor të rëndësishëm, duke organizuar aktivitetin “Porta e Hapur” për të festuar 25-vjetorin e themelimit të Policisë së Kosovës.

Ky aktivitet, ka përfshirë një komponent të veçantë me vizitat e nxënësve nga disa shkolla fillore të Pejës që kanë pasur mundësinë të shohin nga afër punën dhe angazhimin e forcave të rendit.

Sipas zëdhënësit të Policisë së Kosovës në Pejë, Fadil Gashi, kjo nismë ka për qëllim të krijojë një mundësi për qytetarët dhe institucionet të kenë një panoramë të qartë mbi funksionimin dhe angazhimin e policisë në ruajtjen e rendit dhe sigurisë publike.

“Siç çdo vit, ne e organizojmë për nder të themelimit të Policisë së Kosovës ‘Portën e Hapur’, me rastin e të cilit edhe në drejtori të përgjithshme dhe në ato rajonale të rajoneve policore vijnë qytetarë, institucione si shkollat, drejtoritë komunale, përfaqësues të drejtorive komunale të arsimit dhe qytetarë”, ka thënë Gashi për Peja në Fokus transmeton Telegrafi.

Aktivitetet e tilla, veçanërisht përfshirja e fëmijëve, ndihmojnë në promovimin e vlerave të sigurisë dhe përgjegjësisë sociale që do të kontribuojnë në krijimin e një komuniteti më të fortë dhe më të sigurt për të ardhmen. /Telegrafi/